تاند ( شنبه د مرغومي – جدي ۱۳مه) د نیویارک نوي ښاروال زهران ممداني تر لوړې وروسته په خپله وروستۍ وینا کې، د قومي، مذهبي او ژبني تنوع پر بنسټ یادونه وکړه چې، د نیویارک ښار تاریخ به د نورو ژبو ترڅنګ په پښتو ژبه هم ولیکل شي.
زهران ممداني تېره پنجشنبه، نیویارک د ټولو هغو کسانو ملکیت وګاڼه چې په دې ښار کې ژوند کوي.
هغه زیاته کړه چې، د دې ښار ټول اوسېدونکي، پرته له دې چې د دوی ژبه وي، د پښتو په ګډون، مانډرین (د چین رسمي ژبه) او یدش (د ځینو یهودانو دودیزه ژبه)، به د دې نوې کیسې په لیکلو کې رول ولري.
د نیویارک دغه مسلمان ښاروال همدا راز د مذهبي تنوع او د مذهبي مراسمو د ترسره کولو ازادۍ باندې ټینګار وکړ.
د یادونې وړ ده چې، ظهران ممداني د نیویارک ښار لومړنی مسلمان ښاروال دی چې د ۲۰۲۵ کال په ټاکنو کې په پراخه کچه رایې وګټلې او بریالی شو.
هغه د کرایې کنټرول، وړیا بس خدماتو، د ټیټ عاید لرونکو کورنیو ملاتړ او د کډوالو د ساتنې لپاره د خپل کمپاین په جریان کې د خپلو ملاتړو په منځ کې پراخه ملاتړ ترلاسه کړ او تر بریا ورسېد.
ممداني د تېرې پنجشنبې په ورځ، په هغه قران کریم یې رسمي لوړه وکړه چې هغه ته یې له خپل نیکه څخه په میراث پاتې دی.