تاند ( شنبه د لیندۍ – قوس ۲۲مه) د طالبانو د حکومت د صنعت او سوداګرۍ وزیر، نورالدین عزیزي وایي چې افغانستان د ایکو اقتصادي همکاریو سازمان د راتلونکې غونډې کوربهتوب ته چمتووالی لري.
د عزیزي په وینا چې د یاد سازمان غونډه به دا ځل د افغانستان په کوربهتوب وشي.
عزیزي دا کوربهتوب د افغانستان لپاره مهم یاد کړی دی.
د طالبانو د صنعت او سوداګرۍ وزیر همداراز ویلي چې، د دې غونډې لپاره د افغانستان د کوربهتوب موضوع د ایکو سازمان په تېره غونډه کې مطرح شوې او کابل دا مسوولیت په غاړه اخیستی دی.
د مالوماتو له مخې ایکو له هغو مهمو سازمانونو څخه دی چې د غړو هېوادونو ترمنځ د اقتصادي، سوداګریزو، فرهنګي او تخنیکي همکاریو پیاوړتیا په موخه رامنځته شوی.
د یادونې وړ ده چې د دې سازمان په تېره غونډه کې هم افغانستان ګډون وکړ او د افغانستان پر بېلابېلو اقتصادي مسایلو بحثونه پکې وشول.
د طالبانو د صنعت او سوداګرۍ وزیر په دې وروستیو کې د هند په ګډون یو شمېر هېوادونو ته سفرونه هم کړي او له چارواکو سره یې پر بېلابېلو مسایلو خبرې او هوکړې کړې دي.