تاند ( چهارشنبه د لیندۍ ـ قوس ۱۲مه) تر سختې او اوږدې جګړې وروسته په غزه کې د ۵۴ فلسطیني جوړو یو ځايي وادونه شوي دي.
دا په غزه کې د وروستي اوربند وروسته تر ټولو پراخ او هیله بخښونکي مراسم ګڼل شوي دي.
د دغه ډله ییز واده ټول لګښت د الفارس الشهیم په نامه یوه خیریه سازمان کړی دی.
غزه ډېره موده کېږي چې تر جګړې وروسته لږ څه د ارام ساه اخلي او دا ډول خبرونه پکې زیات د پام وړ ګرځي.
دغه خبر هم په خواله رسنیو ستایل شوی دی.
خبریال نوراجان بهیر پرخبله فېسبوک پانه لیکلي: “غزه کې د ۵۴ فلسطیني جوړو یو ځايي وادونه؛ دا له اوربند وروسته تر ټولو پراخ او هیله بښونکي مراسم شوي دي.”
عطاء الله خوګیاڼي لیکلي: “غزه – خان یونس:
د جګړو او روانو کړاوونو تر سیوري لاندې، د خان یونس په سیمه کې د ۵۴ جوړو ګډ واده ترسره شول. په دغو مراسمو کې ګڼو کورنیو او عامو خلکو ګډون کړی و.”
د سیمې اوسېدونکي وايي چې دا ډول مراسم د غم او ویر په ډک چاپېریال کې د لنډو خوښیو د راژوندي کېدو یوه هڅه ده.