تاند (چهارشنبه د لړم ـ عقرب ۲۸مه) د افغانستان او ایران ترمنځ د ۹۰ میلیون ډالرو په ارزښت تړون لاسلیک شو.
د کابل د وچې مېوې د صادرونکو ټولنې ویلي چې، د طالبانو د حکومت، ایران، ازبکستان او هند د چارواکو ترمنځ د B2B او سوداګریز نښلون غونډه وشوه.
یاده ټولنه زیاتوي چې، په دغه څو اړخیزه غونډه کې د پورتنیو هېوادونو لوړپوړو سوداګریزو چارواکو ګډون درلود.
د دغې ټولنې د راپور له مخې د غونډې په څنډه کې د افغان لوري او د ایران د کښتیو د یوه شرکت ترمنځ د ۹۰ میلیون ډالرو په ارزښت تړون لاسلیک کړ.
د دغه تړون پر اساس به افغاني توکي د هغوی په کښتیو کې نړۍوالو بازارونو ته رسیږي.
دغه تړون داسې مهال لاسلیک کېږي، چې بل لورته د افغانستان او پاکستان ترمنځ سوداګري د کړکیچ له امله په ټپه ولاړه ده.
بل لورته تازه د افغانستان د سوداګرۍ وزیر هم په یوه رسمۍ سفر هند ته رسېدلی دی.