تاند (شنبه، د لړم/ عقرب ۱۰ مه) په داسي حال کې چې په پاکستان کې ناامني ورځ تر بلې زیاتېږي او د پاکستان پوخ یې په مخنیوي کې پاته راغلی، د پاکستان دفاع وزیر خواجه آصف وايي چې افغانستان باید د پاکستان د سولې ضمانت وکړي، او که اوسنی وضعیت دوام ومومي، باید د هغې پایلو ته چمتو وي.

هغه «سماء ټلویزیون» ته په مرکه کې وویل چې له افغانستانه ترهګري او سرحدي بریدونه باید په بشپړ ډول پای ته ورسېږي، او که دوام وکړي، نو د دواړو هېوادونو تر منځ هوکړه به خپل ارزښت له لاسه ورکړي.

خواجه آصف ټینګار وکړ چې د پاکستان د سولې ضمانت باید د کابل او ټولو اړوندو لورو له خوا ورکړل شي، ځکه چې دوامداره بې‌ثباتي به د افغانستان په زیان تمامه شي.

راپورونه وايی چې پاکستان د افغانستان د طالبانو له حکومته غواړي چې په خپله خاوره کې یې د ټولو بریدونو مخه ونیسي خو افغان طالبان وايی چې د پاکستان په خاوره کې د بریدونو د مخنیوي ضمانت نه شي کولی او دا د پاکستان خپل کار دی چې مخه یې ونیسي.

هخواجه اصف څرګنده کړه چې پاکستان به د هېڅ ترهګرې ډلې، په ځانګړي ډول د ټي ټي پي (TTP) او د بلوچستان د ازادۍ پوځ (BLA) ونه زغمي، او له پولې رااوښتونکي بریدونه به له کلک ځواب سره مخامخ شي. آصف وویل، پاکستان به هېڅکله له ترهګرۍ سره د مبارزې په اړه په خپل دریځ کې شاتګ ونه کړي.

د هغه په وینا، د پاکستان له لوري د استانبول په خبرو کې شامل کسان به له افغان طالبانو سره په راتلونکو خبرو کې هم ګډون وکړي تر څو د هوکړې جزئیات وروستي کړي.

ده زیاته کړه: «که پرمختګ وشي، ښايي جګپوړي چارواکي هم ورسره یوځای شي. د نوومبر په ۶مه به د سرحدي فعالیتونو د څارنې لپاره یو نوی میکانیزم جوړ شي.»

آصف وویل، افغان طالبانو د TTP د غړو د لېږد په بدل کې لس میلیارده روپۍ غوښتې وې، خو هغوی هېڅ راز ضمانت ورکولو ته چمتو نه وو. ده زیاته کړه، پاکستان چمتو و چې له دې ډېرې هم ورکړي، خو کابل د ژمنې ډاډ ور نه کړ.

هغه وویل، ترکیه او قطر د باور وړ دوستان دي او د منځګړیتوب رول لوبوي، ځکه د پاکستان ګټې دواړو هېوادونو ته مهمې دي. ده زیاته کړه: «زه په ترکیه او قطر باور لرم، خو په افغان طالبانو نه. زه د ترکیې او قطر خبره منم، نه د طالبانو.»

پاکستان وروسته له دې چې د افغانستان د باندنیو چارو وزیر امیرخان متقي هند ته سفر وکړ، پر کابل او پکتیکا په دې پلمه هوايی بریدونه وکړل چې د ټي ټي پي غړي یې په نښه کړي دي.

خواجه آصف وویل، د هند صدراعظم نریندرا مودي سیاسي حیث له لاسه ورکړی او هڅه کوي چې د سیاسي امتیاز لپاره مصنوعي ډرامې جوړې کړي. ده خبرداری ورکړ چې که هند کومه تېروتنه وکړي، پاکستان به ورته سخت ځواب ورکړي.