د افغان کډوالو پر ضد د پاکستان د پولیسو د ځپونکو عملیاتو په اوج کې، د افغانستان د کډوالو د چارو کمېسیون شمېرې ښيي چې د یکشنبې په ورځ، د اکتوبر په ۲۷مه، لږ تر لږه ۸ زره مهاجر له پاکستانه وایستل شول ــ په وروستیو وختونو کې په یوه ورځ دومره ډېر شمېر کډوال نه وو ایستل شوي.
د کمېسیون د معلوماتو له مخې، دا کډوال د کندهار د سپین بولدک او د هلمند د بهرامچې له لارو افغانستان ته ستانه کړل شول.
پاکستان وروسته له هغه د افغان کډوالو ایستلو او ځورولو ته لا زور ورکړ چې د روانې میاشتې په پیل کې پر ډیورند کرښه د افغانستان او پاکستان د ځواکونو ترمنځ د اته ورځو په مخه نښتې وشوې او له امله یې د دواړو خواوو اړیکې خورا ترينګلې شوې. له دغو نښتو وروسته، د پاکستان صدراعظم امنیتي ادارو ته امر وکړ چې د بې اسنادو افغانانو د ایستلو هڅې لا پسې چټکې کړي.
په ورته وخت کې، د افغانستان د کډوالو او بېرته راستنېدونکو د کمېسیون په وینا، د یکشنبې په ورځ د ایران چارواکو هم ۴۸۰ افغانان د اسلامقلعه اوورطښم پُل له پولو څخه وایستل. په دې کې د کډوالو دواړه ډلې شاملې وې؛ هغوی چې په خپله خوښه راغلي او هغوی چې په زوره ایستل شوي.
ایران، چې د پاکستان په څېر په پراخه کچه افغان کډوال باسي، د دې پالیسۍ دلیل په خپل هیواد کې د بې رزوګارۍ زیاتوالی او د پولو د امنیت اندېښنې ګڼي. په ایران کې د بهرنیو اتباعو او مهاجرینو د چارو رئیس، مجید احمدي، تازه اعلان کړی چې افغان کارګر به یوازې هغه مهال ایران ته داخلېدای شي چې په کابل کې د ایران سفارت د کار ویزه ورکړي او د ایراني کارکوونکو تر مستقیمې سرپرستۍ لاندې وګومارل شي.
احمدي دا نوې ویزه د “کفیل” یا سپانسرشیپ سیستم برخه وبلله ــ د کارموندنې رسمي میکانیزم، چې له کلونو راهیسې د خلیجي هېوادونو لهخوا کارول کېږي. نوموړي په وروستۍ غونډه کې ادعا وکړه چې دغه سیستم به نه یوازې د افغان کارګرو، بلکې د کارګومارونکو او د ایران د ټولنې لپاره هم ګټه ولري.
د پلان له مخې، کارګومارونکي باید د ایران د کار وزارت په ویبپاڼه کې نوملیکنه وکړي، ضروري اسناد پورته کړي، او په هغو سکتورونو کې د افغان کارګرو د ګومارلو اجازه وغواړي چې ډېر سخت او خطرناکه کارونه پکې ترسره کېږي. د منظورۍ له تر لاسه کولو وروسته، اړوند کاري اسناد به صادرېږي.
د بشري حقونو بنسټونو او مرستندویو سازمانونو بیا د افغان کډوالو د اجباري بېرته ستنولو پر دوام اندېښنه څرګنده کړې او د افغانستان اوسنی اقتصادي وضعیت یې د کډوالو د ستنولو لپاره مناسبت وخت نه دی بللی.