تاند (سې شنبه د تلې ـ میزان ۲۹مه) پاکستاني رسنیو راپور ورکړی چې د اسلاماباد یوې محکمې د خیبر پښتونخوا د پخواني اعلی وزیر، علي امین ګنډاپور د نیولو امر صادر کړی دی.
ډان پاکستانۍ ورځپاڼې نن (سېشنبه) راپور ورکړی چې د علي امین ګنډاپور د نیولو امر محکمې ته د هغه د نهحاضرېدو له امله صادر شوی دی.
د معلوماتو له مخې چې د خیبر پښتونخوا پر پخواني اعلی وزیر تور پورې شوی چې په ۲۰۱۶ کال د هغه په موټر کې وسلې او الکولي مشروبات کشف شوي دي.
دا حکم داسې مهال صادرېږي چې وړمه ورځ د پاکستان ترهګرۍ ضد یوې محکمې د PTM د مشر، منظوراحمد پښتین د نیولو حکم هم ورکړی دی.
څو میاشتې وړاندې د پاکستان حکومت د پښتون ژغورنې غورځنګ (PTM) د ممنوعه یا بند شویو خوځښتونو په لېست کې شامل کړ او د غورځنګ پر فعالیتونو یې محدودیتونه هم ولګول.