تاند (شنبه، د تلې/ میزان ۲۶ مه) د افغانستان او پاکستان ترمنځ د خبرو لپاره د افغانستان له لوري دفاع وزیر ملا محمد يعقوب مجاهد، او د استخباراتو د رييس ملا عبدالحق وثيق په مشری جګپوړی پلاوی دوحې ته تللی.
د طالبانو وياند ذبيحالله مجاهد نن، د ميزان په ۲۶مه (شنبه)، په خپله ایکسپاڼه کې ليکلي چې دا خبرې نن د طالبانو د استازو او د پاکستان د چارواکو ترمنځ په دوحه کې ترسره کېږي.
مجاهد زياته کړې چې د طالبانو حکومت پر پکتیکا د پاکستان د تېرې شپې هوايي بريدونه ” ښکاره او تکراري تېری” او د “پاکستاني پوځ جنايت” بللی او په کلکو ټکو یې غندای دی.
نوموړي زياته کړه:
«اسلامي امارت به د غچاخيستنې له اقدامه ډډه وکړي او پر سولهييزو خبرو باور لري.»
په همدې وخت کې، د پاکستان دولتي ټلویزيون هم اعلان کړی چې د دغه هېواد دفاع وزير خواجه آصف او د پوځ د استخباراتو رييس عاصم ملک هم دوحې ته روان دي، څو د طالبانو له مشرانو سره د وروستيو تاوتريخوالو په اړه خبرې وکړي.
دا پرمختګ وروسته له هغه کېږي چې د جمعې په شپه، پاکستان د ۴۸ ساعته اوربند له پای ته رسېدو وروسته، د پکتيکا ولايت پر ځينو سيمو هوايي بريدونه وکړل.