تاند (شنبه، د تلې/ میزان ۵ مه) د بخښنې نړیوال سازمان د جمعې په ورځ (د تلې ۴مه) اعلان وکړ چې د ایران اسلامي جمهوریت د روان میلادي کال له پیله تر اوسه تر زرو زیات کسان اعدام کړي دي. دا په تېرو ۱۵ کلونو کې د اعدام شویو کسانو تر ټولو لوړ کلنی شمېر دی چې دغه سازمان ثبت کړی دی.
ایمنسټي انترنشنل یا د بخښنې نړیوال سازمان په خپل بیان کې ویلي دي: «په لږ تر لږه ۹ میاشتو کې، د هغو کسانو شمېر چې د ایران له لوري اعدام شوي، د تېر کال د ۹۷۲ اعدامونو تر وېرونکي شمېر اوښتي دي.»
دغه سازمان له ایراني چارواکو غوښتي چې د لومړي ګام په توګه اعدامونه سمدستي وځنډوي او پر نورو هېوادونو یې هم غږ کړی چې د ټولو پلان شویو اعدامونو د درولو لپاره پر ایران فشار زیات کړي.
د ملګرو ملتونو د بشري حقونو دفتر هم د وږي/سنبلې په ۷مه اعلان کړی و چې د ۲۰۲۵م کال په لومړۍ نیمایي کې په ایران کې «په اعدامونو کې د پام وړ زیاتوالی» لیدل شوی دی.
بخښنې نړیوال سازمان یادونه کړې چې په ۱۴۰۱ هـ ش کال کې په ایران کې د «ښځه، ژوند، ازادي» په نوم د اعتراضونو له وخت راهیسې، ایران د اعدام سزا د «دولتي ځپنې او د اعتراضونو د چوپولو» د وسیلې په توګه ډېره کارولې ده، او په عین وخت کې د نشهيي توکو اړوند جرمونو له امله په اعدامونو کې هم «ستر زیاتوالی» راغلی دی.
د راپور له مخې، ایراني چارواکو په ځانګړي ډول له اسراییل سره له ۱۲ ورځني جګړې وروسته د «ملي امنیت» په پلمه د اعدام سزا ډېره کارولې ده. د همدې جګړې له پیلېدو وروسته حکومت اته کسان د جاسوسۍ په تور اعدام کړي دي.
سازمان همداراز ویلي چې ایراني چارواکي د اعدام سزا په نابرابره توګه پر لږکیو کاروي، په ځانګړي ډول پر افغانانو، بلوچانو او کوردانو.