تاند (دوشنبه د وږي ـ سنبلې ۳۱مه) پاکستاني پولیسو ویلي چې ناپېژانده وسله والو په باجوړ کې د عوامي نشنل ګوند ځايي مشر حاجي میراعظم خان په ډزو وژلی دی.
پولیس وايي، میر اعظم د باجوړ په خزانې موړ سیمه کې پر موټرسایکل خپل کور ته روان و چې، تر برید لاندې راغلی او په ډزو وژل شوی دی.
خو له دغه برید څو ساعته وروسته د داعش خراسان څانګې وسله والې ډلې د دغه هدفي برید پړه منلې.
یادې ډلې ویلي چې باجوړ کې د عوامي نېشنل ګوند ځايي مشر حاجي میراعظم خان د دوی د وسله والو له لوري په ډزو وژل شوی دی.
د عوامي نشنل ګوند (ANP) یوه مرکزي غړي میاافتخار حسین باجوړ کې د دغه ګوند د ځايي مشر وژل کېدل تایید کړي او وايي، هغه بې ګناه و او له هېچا سره یې شخصي بدي نه درلوده.
هغه نیوکه کړې چې برید د پولیسو حوزې ته څېرمه شوی او باید پولیس د پېښې عاملین ونیسي او د قانون منګولو ته یې وسپاري.