تاند ( چهارشنبه د وږي ـ سنبلې ۱۹مه) د پاکستان د جمعیت علمای اسلام ګوند مشر، مولانا فضل الرحمن د قطر پر پلازمېنې دوحې د اسراییل بریدونه چې، د حماس غړي په نښه کړل، په کلکو ټکو غندلی.
فضل الرحمن ویلي، چې د اسراییل دا برید په ښکاره توګه د اسلامي او عربي نړۍ پر خپلواکۍ تېری دی.
نوموړي ادعا کړې،چې دې برید کې د لویدیځ پوځ الوتکې او استخباراتي وسایل کارول شوي دي.
دا په داسې حال کې ده چې پر دوحې د اسراییل بریدونه لویدیځ او امریکا له نارضایت سره مخ شوي او ولسمشر ټرمپ ویلي، چې هغه وخت خبر شو، چې خبره له خبرې تېره وه.
د جمعیت علمای اسلام ګوند د اسلامي همکاریو له سازمان غوښتنه کړې، چې د حماس د مذاکراتي پلاوي او مشر، خالد مشعل امنیتي ډاډ تضمین کړي، څو وکولای شي خپله «مبارزه» سرته ورسوي.
فضل الرحمن له نړیوالې ټولنې او ملګرو ملتونو د غزې د خلکو د خوړو او اوبو محاصرې پر ختمېدو هم ټینګار کړی او هغه یې «جنګي جنایت» ګڼلی دی.
دا په داسې حال کې ده چې تېره ورځ اسراییل د قطر پر پلازمېنې دوحې بریدونه وکړل او ویې ویل چې د حماس د مذاکراتي پلاوي غړي یې په نښه کړي دي. حماس تایید کړه چې ۵ غړي یې وژل شوي.