تاند(سه شنبه د وږي ـ سنبلې ۱۱مه) اروپايي اتحادیې اعلان کړی چې یو میلیون یورو یې د خپلو بېړنیو بشردوستانه مرستو له بودیجې د افغانستان د ختیځ زلزله ځپلو سره د مرستې په موخه ځانګړې کړې دې.
یادې اتحادیې په یوه خبرپاڼه کې ویلي، دا پیسې به هغو بشردوستانه بنسټونو ته ورکړل شي چې، عملاً په اغېزمن شویو سیمو کې د ژغورنې پر عملیاتو بوخت دي.
دې اتحادیې ویلي، سربېره پر دې شاوخوا ۱۳۰۰ مټریک ټنه بشردوستانه لومړنۍ مرستې چې، په کې خېمې، د سرپناه توکي، جامې، طبي وسایل او د څښاک پاکو اوبو د تصفیې وسایل شامل دي د مرستې په موخه اغېزمنو سیمو ته ولېږدوي.
اروپايي اتحادیې زیاته کړې چې لومړنۍ بشردوستانه مرستې به د همدې اوونۍ په وروستیو کې په دوو الوتنو کې کابل ته ورسوي.
د دوشنبې شپې د زورورې زلزلې له امله د کونړ په نورګل، څوکۍ، ماڼوګي، وټه پور، چپې درې ولسوالیو او مرکز اسعداباد کې د طالبانو د مالوماتو له مخې د ښځو او ماشومانو په ګډون ۱۴۱۱ کسان مړه او ۳۱۲۴ نور ټپیان شوي دي.
تازه څو شېبې وړاندې هم ختیځ یوځل بیا د زلزلې ټکانونو ولړزوه.
له کونړه په خپرو شویو ویډیوګانو کې هلته مرستندویان وایي ښایي دې ټکان هم زیانونه اړولي وي، خو لا یې په اړه جزیات نشته.