تاند(سه شنبه د وږي ـ سنبلې ۱۱مه) په کابل کې د ایران سفیر علي رضا بیکدلي نن له یوه پلاوي سره کونړ ولایت ته سفر کړی دی.
د ایران سفارت څرګنده کړې؛ د دې سفر موخه د بشري مرستو چمتو کول او د کونړ ولایت د زلزله ځپلو خلکو د اړتیاوو ارزول دي.
دا لومړنی بهرنی سفیر دی، چې له زیانمنو سیمو لیدنه کوي.
مخکې له دې د ایران ولسمشر د افغانستان د ختیځ زلزله ځپلو ته خپله خواخوږي څرګنده او د بېړنیو مرستو او اړینو توکو لېږلو لپاره یې د خپل هېواد چمتووالی اعلان کړی دی.
تازه ذبیح الله مجاهد وايي، کونړ کې د زلزلې له امله ثبت شوي مړي تر اوسه ۱۴۱۱ او ټپيان بیا ۳۱۲۴ تنو ته رسېدلي دي.
دا مرګ ژوبله د مرکز اسعداباد تر څنګ په نورګل، څوکۍ، چپه دره، پيچ دره، وټپور کې اوښتې ده.
د طالبانو د حکومت ویاند وايي، هغه سیمې چې هلیکوپټر تګ ورته ناممکن و، هلته یې کومانډو ځواکونه د پراشوټ له لارې ښکته کړي دي.
کونړ کې لا هم افغان ځواکونه، عام خلک او ژغورونکي ډلې د ټپيانو او جسدونه په ویستلو کار کوي او د مرګ ژوبلې ارقام هم لا وروستي نه دي.