تاند (جمعه، د زمري/ اسد ۳۱ مه) د طالبانو د حکومت د صنعت او سوداګرۍ وزارت اعلان کړی چې د تازه مېوو، سبزیجاتو او نورو سوداګریزو توکو صادرات د «تورخم» په بندر کې د وخت له مخې تنظیم شوي دي څو د کرنیزو محصولاتو د ضایع کېدو مخه ونیول شي.
د طالبانو د حکومت د صنعت او سوداګرۍ وزارت په یوه خبرپاڼه کې ویلي، له خصوصي سکتور سره له خبرو وروسته د تورخم له لارې پاکستان ته د افغانستان د سوداګریزو توکو د صادراتو لپاره ځانګړي ساعتونه ټاکل شوي دي.
د نوې ویش له مخې، هره ورځ د تازه مېوو او سبزیجاتو د صادراتو لپاره ۱۴ ساعته ځانګړي شوي او پاتې ۱۰ ساعته د نورو سوداګریزو توکو د صادارتو لپاره په پام کې نیول شوي دي.
یاد وزارت ټینګار کړی چې دا نوې پرېکړه د سوداګرو لپاره د لا زیاتې اسانۍ رامنځته کولو، د صادراتو د بهیر د ګړندي کولو او د کرنیزو محصولاتو د ضایع کېدو د کمولو په خاطر شوې ده.
په وروستیو کلونو کې د تورخم په بندر کې د افغان سوداګرو صادرات له ګڼو ستونزو سره مخامخ شوي دي. یوازې په تېرو دوو کلونو کې څو ځله د سوداګریزو توکو بارونه په دې بندر کې درول شوي چې د لسګونو میلیون ډالرو زیان یې سوداګرو ته اړولی دی.
د طالبانو د حکومت د صنعت او سوداګرۍ وزارت چارواکو ویلي، هیله لري چې د دې نوي اقدام په ترڅ کې به د تورخم په بندر کې د صادراتو بهیر د افغان سوداګرو ځینې اوږدمهاله ستونزې حل کړي.
د ننګرهار ولایت تورخم بندر له پاکستان سره د افغانستان تر ټولو مهمه سوداګریزه لار ګڼل کېږي او د افغانستان د تازه مېوو او سبزیجاتو لویه برخه له همدې لارې صادریږي. په وروستیو کلونو کې د دې بندر پرلهپسې تړل کېدو او په ورځو ورځو د کرنیزو محصولاتو د باروړونکو لاریو درېدو افغان سوداګرو ته پراخ زیانونه اړولي دي.