تاند/ یکشنبه د زمري – اسد ۲۶مه/ افغانستان کې د طالبانو تر واک لاندې برېښنا شرکت ویلي، ټاکل شوې نن د افغانستان او ازبکستان ترمنځ د برېښنا شبکې پراختیا او انتقال څلور هوکړې لاسلیک شي.
برېښنا شرکت په یوه خبرپاڼه کې ویلي چې، دغو پروژو کې د سرخان – دشت الوان ۵۰۰ کیلو ولټ برېښنا مزي ۱۰۰۰میګاواټه ته تمدیدول، ۸۰۰میګاولټ ته د ارغندې سب سټېشن ظرفیت لوړول او ۸۰۰ میګاواټه ته د کابل – شیخ مصري ۲۲۰ کیلوولټ مزي تمدیدول شامل دي.
ویل کیږي ۱۲۶ میګاولټ په ظرفیت د ننګرهار شیخ مصري سب سټېشن قرارداد به هم لاسلیک شي.
د مسوولانو په خبره دغه پروژې د برېښنایي سرچینو پراختیا، د سراسري شبکې پیاوړتیا، او د افغانستان او ازبکستان ترمنځ د انرژي برخه کې د دوه اړخیزو همکاريو پراختیا په موخه ترتیب شوې دي.
د طالبانو د برېښنا شرکت دغه راز په یوه بل خبر کې ویلي چې، د یاد شرکت او خصوصي سکټور ترمنځ د ۴۱میلیونه ډالرو په ارزښت د برېښنا سکټور کې درې مهم تړونونه لاسلیک شوي.
برېښنا شرکت ویلي، دې قرار دادونو کې له نورالجهاد سب سټېشن تر هاشمي پل د ۲۲۰ برېښنا مزي تمدید، د پل هاشمي او کب ۲۴مې شهیدانو سب سټېشنونو جوړول او نور الجهاد سب سټېشن کې د “B” مزي پراختیا شامل دي.
دا په داسې حال کې ده، چې تر دې وړاندې د برېښنا شرکت هرات کې خصوصي سکټور سره د لمریزې او بادي برېښنا دوه نور مهم قرار دادونه لاسلیک کړي.