تاند『پنجشنبه د زمري ـ اسد ۱۵مه』ټولنیزو رسنیو د بادغیسي فوټبالر ماشوم محمد عثمان ژوند ور بدل کړ.
تازه افغانستان کې د طالبانو د اولمپیک، بدني روزنې او سپورټ ریاست عمومي سرپرست رییس احمدالله وثیق ویلي، چې په بادغیس ولایت کې محمد عثمان نومی تکړه فوټبالر ماشوم به د مسلکي روزنې لپاره کابل ته را وغواړي.
دې ماشوم، چې په خاورو، دوړو او ساده جامو کې فوټبال کاوه؛ مسلکي حرکتونو یې د ټولنیزو رسنیو پام ځانته را واړوه.
په ټولنیزو رسنیو کې د دغه ماشوم خپرې شوې وېډیو هم زیات مینه وال پیدا او ټولو په یوه غږ د ده د مسلکي روزنې غوښتنه وکړه.
افغانستان کې د ورزشي خبریالانو تازه جوړ شوي فدراسیون هم د دغه ماشوم لپاره له تېرو څو ورځو راهیسې هڅې پیل کړې وې.
خو د طالبانو د المپیک رئیس وثیق وایي؛ محمد عثمان ته به په کابل کې د سپورټ آسانتیاوې برابرې او ډېر ژر به د مسلکي روزنې لپاره کابل ته راوبلل شي.