تاند (سې شنبه، د چنګاښ/ سرطان ۱۷ مه) د افغانستان د طالبانو د بهرنیو چارو وزارت په یوه اعلامیه کې نن وویل چې کابل د ملګروملتو د عمومي اسمبلۍ د پرېکړهلیک هغه برخې مثبتې ګڼي چې د افغانستان د امنیت د ټینګښت، د مخدرو موادو پر ضد د مبارزې، خلکو ته د بشري مرستو، او د اقتصادي ودې لپاره د خنډونو لرې کولو هڅې ستایي، او له نورو هېوادونو غواړي چې له افغانستان سره له سیاسي سیالۍ پرته «رغنده تعامل» ولري.
په اعلامیه کې د بشري حقونو او ترهګرۍ ضد اقداماتو اړوند تورونه رد شوي او ویل شوي:
«په دې پرېکړهلیک کې د پخوانیو پرېکړهلیکونو، راپورونو او ارزونو تایید، په ځانګړي ډول د امنیت او بشري حقونو په برخو کې، او دا چې دا مستندات د استدلال بنسټ ګرځول شوي، هغه تکراري روایت ته دوام ورکوي چې د ځینو هېوادونو د فشار او سیاسي اهدافو پر بنسټ رامنځته شوی او له ځمکنیو واقعیتونو سره بېارتباطه دی.»
اعلامیه زیاتوي، سره له دې چې دا پرېکړهلیک د افغانستان وضعیت ته اشاره لري او د طالبانو له حکومت څخه په مختلفو برخو کې د همکارۍ غوښتنه کوي، خو د پرېکړهلیک په چمتو کولو او تصویب کې له کابل سره هېڅ مشوره نه ده شوې.
په اعلامیه کې دا هم ویل شوي:
«دا وضعیت د پرېکړهلیک د ځینو برخو د دقت او عمليوالي پر وړاندې پوښتنې راپورته کوي.»
خو په پای کې دا هم ویل شوي:
«اسلامي امارت به د دې پرېکړهلیک وړاندیزونه او غوښتنې وارزوي او به ګوري چې د اسلامي اصولو او ملي ګټو په رڼا کې د همکارۍ کومې برخې شوني دي.»
د ملګرو ملتونو عمومي اسمبلۍ د دوشنبې په ورځ یو پرېکړهلیک تصویب کړ چې په لړ کې یې د طالبانو له حکومت څخه غوښتل شوي چې د بشري حقونو درناوی وکړي، نړیوالو قوانینو ته ژمن پاتې شي، او د ترهګرۍ پر ضد جدي ګامونه واخلي.
دغه پرېکړهلیک په ۱۱۶ مثبتو، ۲ منفي (امریکا او اسراییل) او ۱۲ سپینو رایو تصویب شو، او پر افغانستان د نړیوال تمرکز دوام څرګندوي.