تاند「سې شنبه د غبرګولي ـ جوزا ۲۷مه」‏ننګرهار کې د طالبانو د کرنې، اوبو لګولو او مالدارۍ ریاست ویلي، چې د تورخم بندر نباتي قرنطین مدیریت کارکوونکو ۱۳ مټریک ټنه ګنده شوي کچالان بېرته پاکستان ته ولېږل.

یاد ریاست وایي، یاده اندازه ګنده شوي کچالان له پاکستانه افغانستان ته واردېدل.

ننګرهار کې د طالبانو د کرنې ریاست له ټولو سوداګرو غوښتنه کړې، چې باکیفیته محصولات وارد کړي څو هېوادوال له صحي او معیاري خوراکي توکو استفاده وکړي.

دا لومړی ځل نه دی،تر دې وړاندې هم څو څو ځلې له پاکستانه واردېدونکي ګنده او ټیټ کیفیته محصولات یاد هېواد ته بېرته ورګرځول شوي دي.

له پاکستان سره سره په ځلونو له ایرانه هم واردېدېدونکي بې کیفیته تيل بېرته ورلېږل شوي دي.

عام افغانان وایي، د افغانستان ګاونډي هېوادونه په تېره بیا پاکستان په هېڅ برخه کې له افغانستان سره ریښتینی نه دی او تل یې اړیکې بې خونده او په هره برخه کې د دوستۍ څرګندونې دروغجنې ثابتې شوي.