تاند「سې شنبه د غبرګولي ـ جوزا ۲۷مه」د قزاقستان په پلازمېنه آستانه کې د منځنۍ آسیا – چین دوهمه سرمشریزه جوړېږي.
په دې سرمشریزه کې به د منځنۍ آسیا د هېوادونو مشرانو سربېره، د چین ولسمشر شي جینګ پینګ هم ګډون ولري.
ټاکل شوې چې د منځنۍ آسیا – چین په دې سرمشریزه کې په سیمه کې د امنیت ټینګښت، د نړیوالو ګواښونو پر ضد د ګډو هڅو همغږي او د فرهنګي او بشري تبادلو پیاوړتیا په اړه خبرې وشي.
قزاقستاني رسنیو راپور ورکړی، چې د سیمه ییزې همکارۍ پیاوړتیا، د سیاسي خبرو اترو پراخوالی، د سوداګرۍ او اقتصاد اړیکې هم د دې غونډې مهمې برخې دي.
یاده سرمشریزه کې داسې مهال د سیمې امنیتي وضعیت باندې هم خبرې کېږي، چې د منځنۍ آسیا هېوادونو له دې وړاندې له افغانستانه د امنیتي ګواښونو په اړه اندېښنې لرلې دي.
د منځنۍ آسیا – چین لومړۍ سرمشریزه وړم زېږدیز کال په چین کې ترسره شوې وه.
سږنۍ سرمشریزه د آستانیې اعلامیې په لاسلیکولو سره پای ته رسېږي.