تاند (جمعه، د غبرګولي/ جوزا ۹ مه) د منځني ختیځ د هیوادونو د رېلګاډي ادارو د سیمه ییزې شورا پنځه دېرشم کنفرانس چې د ایران په کوربهتوب په تهران کې جوړ شو، د افغانستان د ېالبانو د ټولګټو وزارت د مرستیال محمد اسحاق صاحبزاده په ګډون پای ته ورسېده.
د طالبانو استازي په دې ناسته کې د سیمې له هېوادونو سره، په ځانګړي ډول له افغانستان سره د رېللارو په برخه کې د همکاریو د پراخېدو غوښتنه وکړه.
د ټولګټو وزارت په هغه خبرپاڼه کې چې د پنجشنبې (د جوزا ۸مه) په ورځ یې خپره کړې، ویل شوي چې د افغانستان د رېللارې معین په دې ناسته کې د افغانستان د اوسنیو رېللارو د پروژو، په ځانګړي ډول د خواف ـ هرات کرښې او د “افغانترانس” رېلپټلۍ د پروژې یادونه کړې ده.
خبرپاڼه زیاتوي چې صاحبزاده د ترانزیټي لګښتونو د راکمولو، د سیمې د هیوادونو ترمنځ د صادراتو د پراخېدو او د چین او اروپا د نښلولو په برخه کې د افغانستان پر بالقوه نقش ټینګار کړی دی.
د هغه په وینا، افغانستان کولی شي د ترانزیټ د لګښتونو په راکمولو، د سیمهییزو صادراتو په چټکولو او له اروپا سره د چین په نښلولو کې مهم رول ولوبوي.
ایراني رسنیو د طالبانو د دغه چارواکي له قوله لیکلي چې د ابونصر فراهي د سړک لپاره، د طالبانو حکومت ۱۰ میلیونه یورو ځانګړي کړي دي. ابونصرفراهي په فراه ولایت کې له ایران سره د افغانستان په پوله کې موقعیت لري.
یاد طالب چارواکي همداراز د رېللارې په برخه کې د سیمهییزو همکاریو پر پراختیا ټینګار کړی دی.
د دې ناستې په څنډه کې، د طالبانو د رېلپټلۍ مرستیال د ایران د ارېلګاډو ادارې له مشر سره هم کتلي او دواړو د خواف ـ هرات د رېلپټلۍ د بشپړېدو او همکاریو د پیاوړتیا پر اړتیا ټینګار کړی دی.