تاند【سه شنبه د غبرګولي ـ جوزا ۶مه】د طالبانو د حکومت د ریاست الوزراء اقتصادي مرستیال ملا عبدالغني برادر د صنعت اوونۍ څلورم ملي او نړېوال نندارتون پرانېست غونډه کې صنعت د افغانستان پرمختګ مهمه وسیله بللې ده.
ملا برادر ویلي، طالبان د هېواد صنعتي کېدو لپاره مهمې موخې تعقیبوي او هڅه کوي، چې د بهرنیو وارداتو پر ځای کورني تولیدات او محصولات ډېر کړي.
برادر زیاته کړې چې، دا مهال افغانستان په ۱۳۸ برخو کې ځان بسیاینې ته رسېدلی او صنعت کارانو ته یې د هر اړخیز ملاتړ ډاډ ورکړ.
بل لورته د طالبانو د حکومت د ریاست الوزرا ادارې مرستیال په یادو مراسمو کې ویلي، چې طالبان هېواد کې د صنعت ودې او د صنعت کارانو لپاره لازمو اسانتیاوو برابرولو ته ژمن دي.
نوموړي له صنعت کارانو غوښتي، چې د توکو تولید او تورید کې دې نړېوالو معیارونو ته پاملرنه وکړي.
په ورته وخت کې د طالبانو د کانونو او صنايعو خونې رییس شېرباز کمينزاده ویلي، چې افغانستان په ۱۶۸سکټورونو کې ځان بسياينې ته رسېدلی او اوسمهال د هېواد په کچه ۶۵۰۰فابريکې فعالیت لري چې په کې شاوخوا ۴۲۰ زره کسان په کار بوخت دي.
نوموړي ویلي، د هېواد صنعتکاران به نږدې راتلونکي کې کورني تولیدات په ۲۵سلنه تخفیف هېوادوالو ته وړاندې کړي.
دغه راز د طالبانو د صنعت او سوداګرۍ سرپرست وزیر نورالدین عزیزي د صنعت اونۍ په څلورم ملي او نړۍوال نندارتون کې ويلي، چې د طالبانو حکومت به په افغانستان کې صنعتي انقلاب رامنځته کړي.
عزيزي زياته کړې، چې دا مهال د کورنیو تولیداتو کچه لوړه شوې او ان تر ټولو عادي توکي چې پخوا نه تولیدېدل، اوس د هېواد دننه تولیدېږي.
د طالبانو د صنعت او سوداګرۍ وزارت سرپرست ټينګار کړی، چې د افغانستان ټول کورني توليدات له ښه کيفيت څخه برخمن دي.