تاند【چهارشنبه د ثورـ غویي ۲۴مه】د طالبانو د حکومت د اقتصادي معاونیت په یوه خبرپاڼه کې ویلي، چې ملا عبدالغني برادر د یوه لوړپوړي پلاوي په مشرۍ تاتارستان ته ولاړ.
ټاکل شوې چې ملا برادر او د طالبانو دغه لوړ رتبه اقتصادي پلاوی د کازان شپاړسم نړیوال اقتصادي فورم کې ګډون وکړي.
طالبان وايي، د ملا برادر په مشرۍ پلاوی به د کازان اقتصادي فورم په څنډه کې د یو شمېر هېوادونو له چارواکو سره پر اقتصادي او سوداګرۍ مسایلو لیدنې هم وکري.
کازان فورم یوه نړیواله اقتصادي ناسته ده، چې هر کال د تاتارستان پلازمېنه کې ترسره کېږي.
دا فورم د روسیې او اسلامي همکاریو سازمان (OIC) غړو هېوادونو ترمنځ د اقتصادي، علمي، تخنیکي، ټولنیزو او کلتوري اړیکو د پیاوړتیا لپاره یو مهم پلیټ فارم ګڼل کېږي.