تاند【پنجشنبه د حمل ـ وري ۱۴مه】د پښتو مشهور کومېډین حیات الله، چې په میراوس مشهور وو؛ د ۷۰ کالو په عمر ومړ.
نوموړی د شکرې ناروغۍ له امله په خیبرپښتونخوا کې مړ شو.
هغه څو ورځې مخکې په یوه مرکه کې ویلي وو،چې د شکرې ناروغۍ له امله یې یوه پښه پرې شوې او د بلې پرې کېدو امکان هم شته دی.
میراوس د یو شمېر تلویزیونونو په شمول، ډېرو پښتو خپرونو کې کار کړی دی.
د نوموړي د کومیډي کیسو او سندرو ډېر البمونه هم خپاره شوي دي.
میراوس همدارنګه په بهرنیو هیوادونو کې هم د پښتنو لپاره پروګرامونه ترسره کړي او خپل هنر یې تر هغوی رسولی دی.
هغه د پښتنو او حجرو او مجلسونو کې د ټوکو د راوي په توګه ولسي محبوبیت لري او زیاتره ټوکې یې د پښتنو په ټولنه کې په ورځنیو محاورو بدلې شوې دي.
حیات الله «میراوس» په ۱۹۵۵ ز کال کې د چارسدې په تنګي کې زېږېدلی و او د ۷۰ کالو په عمر ومړ.