تاند (یکشنبه، د وري/ حمل ۳ مه) د جمعیت علمای اسلام (ف) مشر مولانا فضل الرحمان وايي، باید په دې ژور غور وشي چې ایا له افغانستان سره د جګړې واقعي خطر شته او که نه.
هغه له سما ټلویزیون سره په مرکه کې د ترهګرۍ د تاریخي شالید او د افغانستان په جګړه کې د پاکستان د رول په اړه خپل نظرونه شریک کړل.
سما تلویزیون د پاکستان پوځ ته نژدې رسنۍ ده.
هغه وویل: «ترهګرۍ یو تاریخي پس منظر لري، او د دولت تېروتنو پکې مهم رول لوبولی. پاکستان د افغان جګړې له امله له ۳۰ تر ۴۰ میلیونه کسانو ته پناه ورکړه، او موږ پاکستان د جګړې پر مهال د یوې اډې په توګه وکاراوه. دا جګړه ۱۴ کاله روانه وه، او کله چې امریکا د روسیې پر ضد د جهاد ملاتړ ته راغله، حکومت د خلکو په قانع کولو کې پاتې راغی چې دا یو واقعي جهاد و.»
نوموړي د جهاد په اړه وویل چې جهاد د قرآن حکم دی، خو ستراتیژیکه تګلاره پکې اړینه ده.
د جمعیت علمای اسلام (ف) مشر زیاته کړه چې نړیوال ځواکونه د اسلامي نړۍ جغرافیايي وېشونه پېژني او کار ترې اخلي.
مولانا فضل الرحمان ټینګار وکړ چې د توندلاريتوب د زیاتوالي پړه باید پر کوم خاص مذهبي ګوند وا نه چول شي. هغه وویل: «هغه کسان چې وسلې ته لاس کوي، د خپلو کړنو پړه هم په خپله لري، نه د هغوی پر مذهب.»
ده د ترهګرۍ په اړه خپل پخوانی دریځ تکرار کړ او ویې ویل: «زما موقف له تېرو ۱۰ تر ۱۵ کلونو کې بدل شوی نهدی. زه هغه کسان چې زما استاد یې وژلی، مجاهدین نه شم بللای.» نوموړي د افغان عالمانو هغه فتوا ته اشاره وکړه چې جهاد یې پای ته رسېدلی اعلان کړی و، او راتلونکې جګړه یې جګړه وبلله، نه جهاد.
مولانا فضل الرحمان د وروستیو سیاسي پرمختګونو په اړه هم خبرې وکړې او ویې ویل چې ګوند یې له نویو سیاسي تحرکاتو ځان لرې ساتلی.
هغه زیاته کړه: «موږ په لاهور کې د ټولګوندیز کنفرانس (APC) پر مهال اعلان وکړ چې د موجوده نظام د دوام لپاره به خپله مبارزه جاري ساتو. موږ غواړو د خپل هېواد لپاره فکر وکړو او خبرې وکړو.»
نوموړي وویل چې د خپلې ګوند په استازیتوب افغانستان ته د سفر لپاره هم چمتو دی.
هغه وویل چې د بهرنیو چارو له وزارت سره یې مشورې کړې وې او د افغانستان د سفر لپاره یې اجنډا تیاره کړې وه. «ما هلته یوه اوونۍ تېر کړه، او پر مختلفو موضوعاتو باندې مو بحث وکړ. موږ پخوا د امریکا ملاتړ کړی و، موږ هغوی ته اډې ورکړې، او د هغوی ضد جنګېدونکو ته مو هم پناه ورکړه. خو زه دا نه پوهېږم چې بیا ولې زموږ اړیکې له افغانستان سره خرابې شوې.»
مولانا فضل الرحمان له افغانستان سره د جګړې د امکان په اړه خپله اندېښنه څرګنده کړه او ویې ویل: «دا باید وڅېړل شي چې ایا له افغانستان سره د جګړې خطر واقعاً شته او که نه. جګړه به نه د افغانستان، نه د پاکستان په ګټه وي. موږ د افغانستان د سولې لپاره یوې هر اړخیزه ستراتیژۍ ته اړتیا لرو، او واکمنان باید پر دې مسئله فکر وکړي او ټول سیاسي ګوندونه پکې شامل کړي.»