تاند【سه شنبه د کب ـ حوت ۲۸مه】په افغانستان کې د یوناما ماموریت د راتلوونکي یوه کال لپاره تمدید شو.
د ملګرو ملتونو امنیت شورا پرون د دوشنبې په ورځ په افغانستان کې د ملګرو ملتونو د مرستندویه ماموریت (یوناما) موده د یوه بل کال لپاره تمدید کړ.
د امنیت شورا ټولو ۱۵ غړو د یوناما د ماموریت تمدید ته مثبته رایه ورکړه.
دا اداره به تر ۲۰۲۶ کال پورې په افغانستان کې خپل فعالیت ته دوام ورکوي.
تر دې وړاندې د یو شمېر مسایلو پر سر د دې ادارې او د طالبانو د حکومت ترمنځ ناندرۍ هم راپورته شوې.
د طالبانو ویاند ذبیح الله مجاهد یوناما په دې تورنه کړه چې د افغانستان انځور نړۍ ته ناسمه ښیي.
نوموړي یوناما په افغانستان کې ګټوره نه وه بللې.
له دې وړاندې د یوناما مشرې روزا اوتونبایوا ټینګار کړی و چې د طالبانو د سیاستونو له امله د نړۍ صبر ورته ختمېدونکی دی او په کور دننه ترې افغانان ناراضه دي.