تاند (د کب/ حوت ۱۷ مه) په داسې حال کې چې سایبریا او ناروې د سختو واورینو ژمیو په لرلو مشهور دي، په نړۍ کې داسې سیمې هم شته چې هیڅکله واوره پکې نه ده اورېدلې.
د اقلیمي بدلون له امله، ځینې هېوادونه د ژمي د واورو د کمېدو په اړه اندېښنه لري، ځکه چې دا وضعیت د اوړي په موسم کې د وچکالۍ سبب کېدای شي. یو ښکاره مثال یې د هیمالیا غرنیز کمربند دی، چې د ۲۰۲۴ کال په ژمي کې یې په جنوبي برخو کې هیڅ واوره نه ده اورېدلې.
سره له دې، د ځمکې په ځینو برخو کې د واورې اورېدا ناممکنه ده.
په کوم هېواد کې تر ټولو کمه واوره اوري؟
په مرطوبو استوایي ځنګلونو کې، وینزویلا هغه هېواد دی چې تقریباً هیڅکله یې واوره نه ده تجربه کړې.
دا هېواد د جنوبي امریکا په وچه کې موقعیت لري او د اندې غرونه یې یوه کوچنۍ برخه تشکیلوي.
خو له ۱۹۷۰ لسیزې راهیسې، په دې سیمه کې هیڅ واوره نه ده اورېدلې، نو ځکه وینزویلا یو له هغو هېوادونو څخه دی چې نور واوره پکې نه اوري.
همداراز، د افریقا لویه صحرا (Sahara Desert) هم د دې حقیقت ښه بېلګه ده.
دا سیمه چې د نړۍ یوه تر ټولو توده سیمه ده، یوازې یو ځل، د ۲۰۱۸ کال د جنورۍ په میاشت کې، واوره پکې اورېدلې ده. خو د دې صحرا د تودوخې زیاتوالي دا ناممکنه کړې چې هلته د ژمي په موسم کې منظمه واوره وورېږي.
ټاپوګان چې هیڅکله یې واوره نه ده لیدلې
ځینې جزیرې د شنه طبیعت، سپینو شګلنو سواحلو، او رڼو اوبو په خاطر مشهوري دي.
خو که څوک د واورین انسان جوړولو شوق لري، نو دا ټاپوګان ورته د سفر لپاره مناسب ځایونه نه دي.
• د فیجي جزیرې، چې تر پوسکارډ هم ښکلې منظرې لري، هیڅکله پکې چا واوره نه ده لیدلې.
• د جنوبي ارام سمندر په ځینو نور ټاپوګانو، لکه وانواتو کې، چې د ښکلو سواحلو او اورغورځو غرونو له کبله مشهور دي، هم تر اوسه واوره نه ده اورېدلې.
• د تووالو ټاپو، چې ټول کال یې د تودوخې درجه د سانتي ګراد ۳۰ درجې وي، هیڅکله واوره نه تجربه کړې.
• د کارایب یا کربین ټاپوګانو، لکه پورتوریکو، هم هیڅکله واوره نه ده لیدلې.
ولې استوا ته په نژدې هېوادونو کې واوره نه کېږي؟
عموماً، هغه هېوادونه چې د استوا کرښې ته نژدې موقعیت لري، یا خو هیڅکله واوره نه کېږي او یا ډېره لږ اوري.
• دا سیمې استوایي اقلیم لري، چې پکې تودوخه تل لوړه وي.
• که څه هم دا هېوادونه د نورو سیمو په پرتله زیات باران لري، خو هلته د واورې اورېدا ته شرایط برابر نه دي.
• د دې سیمو د هوا درجه تقریباً ټول کال ثابته وي، نو د واورې د اورېدو لپاره مناسبې نه دي.
سره له دې، په غرنیو سیمو کې لا هم واوره اوري.
په اندې غرونو کې لا هم واورې اوري، او دا ځای د سکي لپاره مناسب بلل کېږي.