تاند【یکشنبه د کب ـ حوت ۵مه】د چمپینز ټرافۍ د لوبو پر دوام نن یکشنبه هند او پاکستان لوبډلې د متحده عربي اماراتو په دوبۍ کې مخامخ دي.
د هند او پاکستان سیالي، تل د دوو هیوادونو ترمنځ د اختلافاتو له کبله حساسه ګڼل کېږي او یوه له هغو سیالیو څخه ګڼل کېږي چې د لیدو مینه وال یې ډېر دي.
پاکستان په دې سیالیو کې خپله لومړنۍ سیالي بایللې او هند بیا خپله لومړنۍ سیالي ګټلې ده.
پرون شنبه د اسټرالیا او انګلستان ترمنځ خورا په زړه پورې لوبه وشوه.
د استرالیا لوبډلې په حیرانوونکي ډول د انګلیستان لوبډلې ته په ۵ ویکټونو او ۱۵ اضافي توپونو ماته ورکړه.
انګلیستان د ۸ لوبغاړو د سوزېدو او ۵۰ اورونو په پای کې ۳۵۱ منډې وکړې. ګومان نه کېده چې استرالیا دې دا لوړ هدف پوره کړای شي.
په پیل کې د استرالیا لومړني دوه لوبغاړي په داسي حال کې وسوزېدل چې ۲۰ منډې یې لا نه وې کړي، دې شي د استرالیا د ماتې په اړه باور لا زیات کړ خو د استرالیا نور لوبغاړي وارخطا نه شول او په تدریج سره یې د لوبې نتیجه د ځان په ګټه واړوله.
په دې سیالۍ کې د انګلیستان پیلګر لوبغاړي بین دوکیټ خورا ښه بیټنګ وکړ. ده په ۱۴۳ توپونو ۱۶۵ منډې وکړې. خو د استرالیا لپاره بیا جوش لینګلس په ۸۶ توپونو ۱۲۰ منډې وکړې.