تاند (یکشنبه، د سلواغې. دلوې ۲۸ مه) د ننګرهار په لالپوره ولسوالي کې د افغان او پاکستاني ځواکونو ترمنځ نښته شوې ده.
د ننګرهار ولایت لالپورې ولسوالۍ ته څېرمه پر ډیورنډ کرښه د افغان او پاکستاني ځواکونو ترمنځ دا نښته نن (یکشنبې، د فبروري ۱۶مه) پیل شوه.
د ننګرهار د پولیسو ویاند سیدطیب حماد افغان اسلامي اژانس ته ویلي چې افغان ځواکونو د خپلو پوستو د قوي کولو لپاره سنګرونه کیندل چې ناڅاپه د پاکستاني ځواکونو له خوا پرې ډزې وشوې.
حماد زیاته کړه، افغان ځواکونو متقابلې ډزې وکړې او د ډیورنډ کرښې هغې غاړې ته یې د پاکستاني ځواکونو دوې امنیتي پوستې په نښه کړې.
نوموړي وویل چې افغان ځواکونو ته زیان نه دی اوښتی، خو جګړه لا هم روانه ده.
پاکستاني چارواکو د دې خبر د خپرېدو تر شېبې پورې د دې نښتې په اړه څه نه دي ویلي.
د طالبانو له واکمنۍ وروسته په خوست، پکتیا، پکتیکا، کندهار او ننګرهار ولایتونو کې د افغان او پاکستاني ځواکونو ترمنځ په ځلونو نښتې شوي چې له امله یې دواړو خواوو ته مرګژوبلې اوښتې دي.
پاکستاني ځواکونو د افغانستان په خاوره کې په بیلابیلو سیمو کې په ځلونو هاوانونه توغولي، چې له امله یې د افغانستان امنیتي ځواکونه او ملکي وګړو ته مرګژوبله اوښتې او ځینې کورنۍ یې امله له خپلو سیمو بېځایه شوي دي.
همداراز، پاکستاني الوتکو لږ تر لږه دوه ځله د افغانستان هوایي حریم نقض کړی او د افغانستان پر خاوره یې بمباري کړې چې کابل پرې قوي غبرګون وښود.
څو ورځې وړاندې د هلمند ولایت په بهرامچې ولسوالۍ کې هم د دواړو لوریو ترمنځ لانجه پېښه شوه، خو د وسله والې نښتې شبب نه شوه.