تاند (پنجشنبه، د سلواغې/ دلوې ۱۸ مه) د طالبانو حکومت پرون (چهارشنبې) د کمالخان بند د درېیم فاز د پرانیستې خبر ورکوي.
د طالبانو د اوبو او انرژۍ وزارت په ایکس (پخواني ټویټر) کې لیکلي، چې د دې بند د درېیم فاز د چهارشنبې په ورځ په یو لړ مراسمو کې پرانیستل شو.
په دې مراسمو کې د دې وزارت سرپرست عبداللطیف منصور او د طالبانو یو شمېر نورو چارواکي ګډون درلود.
دا بند په ۱۴۰۰ لمریز کال د افغانستان وروستي ولسمشر اشرف غني پرایستی و. ښاغلي غني دا بند په داسي حال کې پرانیستی و چې د دغه بند ځینې اوبلارې یا کانالونه جوړ شوي نه و. طالبان وايي چې په وروستیو درو کلونو کې یې د اوبلارو نیمګړي کارونه بشپړ کړي دي.
د ایران د بهرنیو چارو وزیر عباس عراقچي چې تازه یې کابل ته سفر کړی، ویلي چې کمالخان بند تخنیکي بدلونونو ته اړتیا لري، څو د اوبو مسیر ایران ته لا اسانه شي.
د کمالخان بند ځانګړتیاوې:
📌 ځای: د نیمروز ولایت، چهار برجک ولسوالۍ
📌 د اوبو زېرمه: ۵۲ میلیونه متر مکعب
📌 د بریښنا تولید: ۶ میګاواټه
دا بند په ۲۰۲۱ میلادي کال کې، شاوخوا پینځه میاشتې تر هغه مخکې چې طالبان واک ته راشي، پرانیستل شوی و؛ خو د دې بند د اوبو کانالونه لا تر اوسه بشپړ نه دي.