تاند (چهارشنبې. د مرغومي/ جدي ۱۹ مه) د طالبانو د ريیس الوزرا سیاسي مرستیال په کابل کې د ایران له سفیر سره په کتنه کې وویل، په افغانستان کې داسې کسان نه شته چې د ایران او طالبانو اړیکې خرابې کړي.
مولوي عبدالکبیر زیاته کړه چې د اوبو د حق مسله د دواړو هېوادونو ترمنځ د تفاهم له لارې حل شوې ده.
ارګ د چهارشنبې په ورځ، د جدي په ۱۹مه، په یوه خبرپاڼه کې لیکلي چې د ایران سفیر علیرضا بیکدلي په دې کتنه کې د کابل او تهران ترمنځ د اړیکو د پراختیا او اقتصادي همکاریو د زیاتوالي پر اهمیت ټینګار وکړ. هغه وویل چې د چابهار بندر فعالول او پرانیستل د ایران د اسلامي جمهوريت د هڅو په سر کې ځای لري.
په وروستیو ورځو کې د ایران د بهرنیو چارو وزارت له طالبانو غوښتي چې له افغانستان څخه ایران ته د اوبو حق ورکړي او په دې برخه کې خنډونه لرې کړي. د دې وزارت ویاند ویلي چې د ایراني چارواکو د طالبانو له چارواکو سره په اړیکو کې خپلې اندیښنې او اعتراضونه په جدي توګه وړاندې کړي، په ځانګړې توګه د اوبو پر محدودیتونو یا د اوبو د مسیر پر بدلولو.
عبدالکبیر ویلي چې طالبان له ایران سره د اقتصادي او سیاسي همکاریو پراختیا غواړي.
د طالبانو د خبرپاڼې له مخې، عبدالکبیر زیاته کړې: “په افغانستان کې داسې عوامل نشته چې د ایران او افغانستان اړیکې خرابې کړي.”
عبدالکبیر همداراز ویلي چې طالبان به اجازه ورنه کړي چې د دوی اړیکې له نورو هېوادونو سره د نورو اړخونو تر اغیز لاندې راشي.
هغه زیاته کړه چې افغانستان د سیمهییز ثبات او اقتصادي پرمختګ لپاره هڅه کوي.
د ایران د بهرنیو چارو وزارت ویاند ویلي چې ایران څو ځله، په ځانګړې توګه له رسمي او ډیپلوماتیکو لارو، افغان اړخونو ته ویلي چې د اوبو له سرچینو او حوزو څخه باید په داسي حال کې استفاده وشي چې د ایران د اوبو حق رعایت شۍ، دوه اړخیز تړونونه، عرفي اصول، د ښه ګاونډیتوب اصل او چاپېریالي ملاحظات په پام کې ونیول شی.
عبدالکبیر دا هم ویلي چې په افغانستان کې د مخدره موادو کر او قاچاق له منځه تللی دی. هغه له ایران څخه غوښتي چې افغان کډوالو ته لازمې اسانتیاوې برابرې کړي او له هغوی سره “نرمه” رویه وکړي. هغه همدارنګه د افغان کډوالو د جبري ایستلو د بندیدو غوښتنه کړې ده.