تاند (شنبه، د جدي/ مرغومي ۸ مه) یوه هسپانوي نادولتي سازمان په یوه راپور کې ویلي چې په ۲۰۲۴ کال کې تر ۱۰ زرخ زیات کډوال چې د سمندر له لارې یې هسپانیا ته د رسېدو هڅه کوله، خپل ژوند له لاسه ورکړی دی.
د “کامیناندو فرونتراس” په نوم د دې نادولتي سازمان راپور چې د پنجشنبې په ورځ، د دسمبر په ۲۶مه خپور شو، ښیي چې په ۲۰۲۴ کال کې په منځنۍ توګه هره ورځ ۳۰ کډوال هسپانیا ته د کوچنیو بیړیو په واسطه د رسېدو په هڅه کې خپل ژوند له لاسه ورکړی دی.
د دې سازمان شمېرې چې د کډوالو د کورنیو له معلوماتو او د ژغورل شوو کسانو له رسمي شمېرو راټولې شوې دي، څرګندوي چې د دې لارې په اوږدو کې د کډوالو د مړینې کچه ۵۸ سلنه لوړه شوې ده.
د راپور له مخې، په ۲۰۲۴ کال کې لسګونه زره کډوالو له لوېدیځې افریقا څخه د کنري ټاپوګانو په لور حرکت کړی دی. دا ټاپوګان چې په هسپانیا پوري تړاو لري او د افریقا ساحلونو ته نژدې موقعیت لري، اروپا ته د تلو د پولې په توګه ګڼل کېږي او ورځ تر بلې زیات کډوال ورته مخه کوي.
د هسپانیا د کورنیو چارو وزارت ویلي چې د ۲۰۲۴ د دسمبر تر ۱۵ پورې، له ۵۷ زرو او ۷۰۰ څخه زیات کډوال د سمندر له لارې هسپانیا ته رسېدلي، چې دا د تېر کال د همدې مودې په پرتله شاوخوا ۱۲ سلنه زیاتوالی ښيي. ډېری دا کډوال د اطلس سمندر له لارې هسپانیا ته رسېدلي دي.
د “کامیناندو فرونتراس” د سازمان شمېرې هم څرګندوي چې له ۱۰ زرو او ۴۵۷ څخه زیاتې مړینې چې د ۲۰۲۴ د دسمبر تر ۱۵ پورې ثبت شوې دي، د ” اطلس سمندر لارې” په اوږدو کې شوې دي. په دې کې ۱۵۳۸ ماشومان او ۴۲۱ ښځې شاملې دي.
د راپور له مخې، د ۲۰۲۴ د اپرېل او مې میاشتې د اطلس سمندر لاره د کډوالو لپاره تر ټولو خونړۍ میاشتې وې. دا لاره د نړۍ یوه خطرناکه لار ګڼل کېږي.
همداراز، د “کامیناندو فرونتراس” خپرې شوې شمېرې ښيي چې په ۲۰۲۴ کال کې د هغو کوچنیو بیړیو شمېر په پراخه توګه زیات شوی چې له موریتانیا څخه د کنري ټاپوګانو په لور روانېږي.
هسپانیا په ۲۰۲۴ کال د فبرورۍ په میاشت کې ژمنه وکړه چې موریتانیا ته به ۲۱۰ میلیونه یورو (شاوخوا ۲۱۸ میلیونه ډالر) مرسته وکړي څو دغه هېواد وکولی شي د انساني قاچاقبرو پر وړاندې مبارزه وکړي او د کوچنیو کښتیو حرکت ودروي.
هسپانیا د هغو پناه غوښتونکو یو اصلي هدف ګڼل کېږي چې د ښه ژوند په لټه کې سمندر ته مخه کوي او د اروپا په لور روانېږي.