تاند ( دوشنبه د مرغړمي ـ جدي ۳مه) د افغانستان او پاکستان د سوداګرۍ او صنایعو ګډې خونې یا PAJCCI خبرداری ورکړی، که په سوداګریزه برخه کې پاکستان خپل انحصاري سیاست ته دوام ورکړي؛ نو د ۲.۷۶ میلیارد ډالرو په ارزښت به د افغانستان بازار له لاسه ورکړي.
دوی د پاکستان پر سیاستونو نیوکه کړې او خبرداری یې ورکړی چې دوام به یې د افغانستان ټوله سوداګري چابهار ته انتقال کړي.
په خبرپاڼه کې راغلي، د افغانستان ټرانزیټي سوداګرۍ په اړه وروستيو محدودیتونو دوه اړخیزه سوداګري ۸۰ سلنه راکمه کړې ده.
د ګڼو تړونونو، ناستو او ژمنو سره سره بیا هم وخت ناوخت پاکستان خپلې دروازې د افغان سوداګرو پر مخ تړلي، خو د طالبانو حکومت وایي، چې اوس د انحصار له پخواني حالته راوتی او دمګړۍ منځنۍ اسیا، چین، ایران، هند او اروپایې هېوادونه اوس هغه ګڼ انتخابونه دي، چې افغان سوداګر یې د کراچۍ له بندره بې پروا کړي دي