تاند ( شنبه د لیندۍ/ قوس ۲۴مه) د حماس غورځنګ د لوړپوړي غړي خالد مشعل ورور مفید عبدالقادر امریکا کې تر ۱۶ کاله زندانه وروسته ازاد شوی دی.
فلسطیني رسنیو ویلي، چې فلسطین الاصله امریکایي، مفید عبدالقادر به د یو کال لپاره د ښه کېدو مرکز ته واستول شي.
امریکايي چارواکو تر دې مهاله په دې اړه څه نه دي ویلي.
مفید عبدالقادر ۲۰۰۸ زېږیز کال کې د حماس د ملاتړ په تور امریکا کې ونیول شو او په شل کاله زندان محکوم شوی و.
نوموړی امریکا کې د یوه فلسطیني مرستندویه بنسټ غړیتوب هم په غاړه لري.
راپور کې ویل شوي چې، غزه کې د اوربند او یرغمل شویو د خوشې کولو د روانو خبرو اترو سره سم د عبدالقادر خوشې کېدل هم د دغې هوکړې یوه برخه ده.
د دې راپور له مخې، امریکا دغه هېواد کې د نورو فلسطیني سیاسي بندیانو د بند موده هم کمه کړې ده.
تر دې وړاندې رویټرز د یوه امریکایي چارواکي په حواله راپور ورکړی چې، حماس له اسراییل سره د اوربند او یرغمل شوی د خوشې کولو هوکړې لپاره خپل دریځ نرم کړی دی.