تاند ( شنبه د لیندۍ / قوس ۱۰مه) په بدخشان ولایت کې د سړې هوا له امله درېیو ماشومانو خپل ژوند له لاسه ورکړی دی.
بدخشان د طالبانو د حکومت د اطلاعاتو او کلتور رييس حکمت الله محمدي وايي، چې دا پېښه تېر ماښام د دغه ولایت د راغستان ولسوالۍ په نوآباد سياب کلي کې شوې ده.
د محمدي په وينا، مړه شوي ماشومان کالر کلي ته پر لاره وو، چې په لاره کې د ډېرې واورې او سختې يخنۍ له امله مړه شول.
بدخشان د افغانستان یو له سختو سړو سیمو یادېږي، چې اوسېدونکي یې د لازمو لومړنیو امکاناتو د نشتوالي له امله له سختو ستونزو سره مخ دي.
ځایي خلک یې له دې امله له حکومته ګیله لري، چې وایي په ځلونو غوښتنو یې هم د ژمي په راتګ سره څنګه چې لازمه ده لاسنیو نه دی شوی.