تاند ( سه شنبه د لیندۍ/ قوس ۶مه) د طالبانو د حکومت ویاند تېره شپه په خپله اېکس پاڼه د امربالمعروف او نهی عن المنکر وزارت د تېرو ۳ کلونو لاسته راوړنې خپرې کړي.
ذبیح الله مجاهد لیکلي، چې یاد وزارت شاوخوا ۲۰ زره هغو ښځو ته د میراث، مهر او نورو اساسي حقونو تأمین کړي، چې په ټولنه کې د ناسمو دودونو او بې مانا غیرتونو له کبله ترې اخیستل شوي وو.
مجاهد زیاته کړې، یاد وزرات تېرو درېیو کلونو کې د ۵ زره هغو جبري نکاحوو مخنیوی کړی چې د جبر یا پیسو په بدل کې ورکول کېدې.
په معلوماتو کې راغلي، چې د طالبانو حکومت په هېواد کې د ښځو پر وړاندې د کورنيو تاوتریخوالي په برخه کې د فزیکي او ذهني تشدد برخه کې د مخنیوي په موخه هم هڅې کړې او یواځې په تېرو شپږو میاشتو کې د ۱۰۰۰ هغو مېرمنو ستونزې حل شوي، چې په ټولنه کې د شرعي حقونو او یا په کورنو کې د خوشحالۍ له نعمت څخه محرومې وې.
دا راپور داسې مهال خپرېږي،چې اوسمهال افغانستان کې مېرمنې د همدې وزارت له لوري له خپلو اساسي حقونو لکه کار، زده کړو او … محرومې دي.
افغانې مېرمنې وایي د طالبانو امربالمعروف وزارت افغان ښځو ته د حقونو پر ځای د ژوند کړۍ راتنګه کړې ده. مستعار نومې ټولنیزه فعاله ډيوه په باور ده چې طالبانو له افغان مېرمنو آن اسلامي حقونه هم اخیستي دي.
د جبري نکاحو د مخنیوي په اړه د طالبانو د امرباالمعروف وزارت راپور داسې مهال خپرېږي، چې تازه د سرچینو د معلوماتو له مخې د ننګرهار د عمومي زندان مشر له یوې زندانۍ سره د جبري نکاح تر تړلو وروسته له دندې ګوښه شوی دی.
بل لورته د نظر خاوندان بیا د دې راپور په غبرګون کې وایي چې تر بل هر وخت افغان مېرمنې د اوسني نظام د محدودیتونو له امله له فشار او ذهني شکنجې سره مخې دي.
حقوقپوه عبدالله محمدي هیله لري چې د طالبانو حکومت به ژر د افغان ښځو پر وړاندې د محدودیتونو دروازې پرانیزي او د دوی اساسي حقونه چې اسلام ورکړي اداء کړي.
دی وایي اوسنی نظام که د ښځو د حقونو مدافع ځان بولي د نجونو پر وړاندې د ښوونځیو او پوهنتونو دروازې پرانېزي، چې په تېرو درېیو کلونو کې د ناسمو دلایلو په بهانه تړل شوي دي.