تاند (چهارشنبه، د عقرب/ لوم ۳۰ مه) د افغانستان پخواني ولسمشر حامد کرزي د افغانستان په چارو کې د ایران له ځانګړي استازي سره په کتنه کې د افغانستان د خلکو د ستونزو د حل لپاره د یوه سیمه ییز نوښت غوښتنه وکړه.
په کابل کې د ایران سفارت وايي چې حامد کرزي د سیمې له هیوادونو په ځانګړي ډول له ایران څخه د افغانستان مسئلې ته د زیاتې پاملرنې غوښتنه کړې ده.
د ایران سفارت د چهارشنبې په ورځ، د عقرب ۳۰، په یوه خبرپاڼه کې چې په ایکسپاڼه کې خپره شوې ده، د حامد کرزي او حسن کاظمي قمي د لیدنې خبر ورکړی دی.
حامد کرزي د دې کتنې او د افغانستان د مسئلې د حل لپاره د سیمه ییز نوښت په اړه څه نه دي ویلي.
د ایران د اسلامي جمهوریت سفارت د ورکړل شویو معلوماتو له مخې، حسن کاظمي قمي د طالبانو د ريیس الوزرا د اداري چارو له مرستیال له عبدالسلام حنفي، او بهرنیو چارو وزیر امیرخان متقي سره هم جلا لیدلي دي.
د سفارت په وینا، د کاظمي قمي او د طالبانو د دې چارواکو ترمنځ په لیدنو کې د افغانستان روان وضعیت ارزول شوی، خو د دې بحثونو د جزئیاتو په اړه ډېر څه نه دي ویل شوي.
طالبانو ویلي چې ایران له دوی سره د سیاسي همکاریو د پراختیا غوښتنه کړې ده.
دا لیدنې کتنې وروسته له هغې کېږي چې د ایران د اسلامي جمهوریت یو پلاوی کابل ته سفر وکړ او له طالب چارواکو سره یې خبرې وکړې.
کابل ته د ایراني پلاوي د سفر په ترڅ کې هوکړه شوې چې ډېر ژر به زر افغان بندیان طالبانو ته وسپارل شي.
حامد کرزی له اوږدې مودې راهیسې د بینالافغاني خبرو ملاتړ کړی او په تېرو دریو کلونو کې یې تل د افغانستان د مسئلې د حل لپاره د «ملي خبرو اترو» غوښتنه کړې ده. د افغانستان پخوانی ولسمشر د نجونو د ښوونځیو د تړلو کلک منتقد دی او څو ځله یې له طالبانو غوښتي چې د نجونو ښوونځي بېرته پرانیزي.
ایران له طالبانو سره نژدې اړیکې لري او تل یې په افغانستان کې د یو ټولشموله حکومت د جوړېدو غوښتنه کړې ده.