تاند (پنجشنبه، د عقرب ۲۴ مه) د ترانسپورت او هوايي چلند وزارت نن (پنجشنبه) په یوه خبرپاڼه کې ویلي چې د خوست ولایت له هوايي ډګر څخه سعودي عربستان ته مستقیمې الوتنې پیل شوې دي.
په خبرپاڼه کې راغلي چې هره اوونۍ به یوه الوتنه د خوست ولایت له هوايي ډګر څخه د سعودي عربستان جدې ښار ته کیږي.
د ترانسپورت او هوايي چلند وزارت د خبرپاڼې پر اساس، لومړۍ الوتنه به د راتلونکې اوونۍ د چهارشنبې په ورځ، د عقرب په ۲۳مه، له خوست څخه جدې ته ترسره شوه.
د ورکړل شوو جزئیاتو له مخې، کام ایر هوايي شرکت له خوست څخه جدې ته د مسافرو وړلو مسؤلیت لري.
پخواني ولسمشر محمد اشرف غني د ۱۴۰۰ کال د سرطان په میاشت کې د خوست هوايي ډګر پرانیست. یوه میاشت وروسته، په هماغه کال د اسد په میاشت کې، طالبان کابل ته ننوتل او په افغانستان کې یې واک ترلاسه کړ.
د طالبانو د واکمنۍ له راتلو وروسته، د افغانستان له ډېرو هوايي ډګرونو الوتنې درول شوې وې.
خو په تېرو درې کلونو کې، ځینو هوايي شرکتونو لکه د متحده عربي اماراتو او د ترکیې هوايي شرکتونو افغانستان ته الوتنې بېرته پیل کړې.
تر دې مخکې له خوست څخه متحدخ عربي اماراتو ته هم الوتنې پیل شوې وې.