تاند (چهارشنبه، د عقرب ۲۳ مه) وروسته له دې چې طالبانو نن په پکتیا ولایت کې د عامو خلکو او د خپل حکومت د دوو وزیرانو په مخکې یو تن قصاص کړ، د افغانستان د بشري حقونو لپاره د ملګرو ملتونو ځانګړي راپورتر له طالبانو وغوښټل چې «ظالمانه سزاګانې» سملاسي ودروي.

په کابل کې د ملګرو ملتونو دفتر (یوناما) ویلي چې په عام محضر کې اعدام د افغانستان د نړیوالو بشري حقونو له ژمنو سره په ټکر کې دی او باید ودرول شي.

طالبانو نن (چهارشنبې) د پکتیا ولایت په مرکز ګردېز کې د «قصدي قتل» په تور په یوه تن په عام محضر کې د قصاص حکم تطبیق کړ.

د افغانستان لپاره د ملګرو ملتونو ځانګړي د بشري حقونو راپورتر ریچارد بینیټ د طالبانو دا اقدام وغانده او پر خپله ایکسپاڼه کې یې ولیکل: «زه د افغانستان د ګردیز په یوه لوبغالي کې نننی وحشتناک اعدام او همدارنګه نورې بدني سزاګانې او اعدامونه چې طالبانو یې ترسره کړي، غندم.»

هغه زیاته کړه: «زه له طالبانو غوښتنه کوم چې سمدستي دا ظالمانه سزاګانې چې د بشري حقونو ښکاره سرغړونه ده، ودروي.»

یوناما هم په یوه یادښت کې په افغانستان کې د اعدامونو د درولو غوښتنه کړې ده.

د ملګروملتو مرستندوی ماموریت وايي: «هغه اعدامونه چې په عام محضر کې ترسره کېږي، د افغانستان د نړیوالو بشري حقونو له ژمنو سره په ټکر کې دي او باید ودرول شي.»

یوناما همداراز د خلکو د عادلانه محاکمې لپاره د قانوني پروسې د درناوي غوښتنه کړې ده.

د طالبانو تر کنټرول لاندې سترې محکمې ویلي چې د کورنیو چارو وزیر سراج الدین حقاني او د مهاجرینو وزیر خلیل الرحمان حقاني د قصاص د حکم د اجرا پر مهال حاضر وو. حقاني له معمول دود سره سم د مقتول له کورنۍ وغوښتل چې قاتل وبخښي خو هغوی د حقاني غوښټنه ونه منله.

قصاص شوی کس محمد ایاز نومېده او د پکتیا ولایت د میرزکي ولسوالۍ اوسېدونکی وو چې د یو کس په وژلو تورن وو، خو په اعلامیه کې د مقتول په اړه هیڅ ډول معلومات نه‌‌دي ورکړل شوي خو ځايي اوسیدونکي وايي چې وژل شوی کس حبیب الله نومېده.

طالبانو ویلي چې د اعدام شاوخوا ۳۰ نور حکمونه د طالبانو د مشر د ملا هبت الله، د وروستي تایید ته منتظر دي.

نن قصاص د طالبانو تر بیا واک ته رسیدو وروسته د اعدام اوومه پېښه ده چې په عام محضر کې عملي کېږي.