تاند ( سه شنبه، دمیزان ۱۷مه) د ملګرو ملتونو د خوړو نړیوال پروګرام په یوه تازه راپور کې ویلي، چې په افغانستان کې ۱۲،۴ میلیونه وګړي د خوراکي توکو د ترلاسه کولو له سخت حالت سره مخ دي.
دغه سازمان وايي چې ډېری افغانان نه پوهېږي چې څنګه د خپل ځان لپاره د بل وخت خواړه ترلاسه کړي.
د خوړو نړیوال پروګرام زیاتوي چې د ۲۰۲۴کال تر دسمبر پورې په هیواد کې اړمنو خلکو ته د مرستې لپاره په بېړنۍ ډول ۶۱۷ ملیونه ډالرو ته اړتیا لري.
د دغه سازمان په راپور کې راغلي چې د طالبانو د حکومت له بیا جوړېدو وروسته د مرستو د بسته بندۍ تمویل لپاره سخت مالي کړکېچ د خوراکي توکو د مرستو رسولو لړۍ له خطر سره مخ کړې ده.
یاد سازمان تېره ورځ هم ویلي وو، چې په افغانستان کې یې د روان کال له پیل نه تر دې دمه له شاوخوا ۴ ملیونه اړمنو افغانانو سره نغدي مرسته کړې ده.
یاد پروګرام زیاته کړې وه، چې په دې ۴ ملیونه کې نیمایي یې ښځې دي او په دې پار یې ورسره مرسته کړې، څو دوی خپلو کورنیو ته اړمن توکي وپېري او خپلې اړتیاوې پوره کړي.