تاند (یکشنبه، د میزان ۸ مه) د پیښور یوه قاضي انعام الله وزیر، د ښار د مرکزي زندان (سنټرل جېل) د لیدو پرمهال په دې اندېښنه ښکاره کړه چې په دغه محبس کې افغان ماشومان بندیان دي.
د ډان ورځپاڼې د راپور له مخې، قاضي وزیر د افغان ماشومانو د خوشي کېدو غوښتنه وکړه. دا ماشومان په دې خاطر نیول شوي چې په پاکستان کې یې د اوسیدو قانوني اسناد نه لرل.
نوموړي د جمعې په ورځ د پیښور د مرکزي زندان له لیدو وروسته، د پاکستان د حکومت پر چارواکو غږ وکړ چې د ماشومانو د بیرته ستنولو پروسه ژر تر ژره پیل کړي.
انعام الله وزیر د افغان بندیانو روغتون، پخلنځی او خونې معاینه کړې او د بندیانو لپاره یې د خوړو د کیفیت د ښه کېدو غوښتنه وکړه.
کله چې قاضي وزیر د پیښور مرکزي زندان ته لاړ نو هلته ځینو افغان ماشومانو ژړل او ځینو نورو د جامو او اسانتیاوو له نشتوالي شکایت کاوه.
دا ماشومان هغه مهال نیول شوي چې بې اسناده د تورخم له لارې خیبرپښتونخوا ته داخلېدل.
د زندان د چارواکو په وینا، دوی د کورنیو چارو له عمومي ریاست سره اړیکه نیولې چې خپل هېواد ته دا ماشوم بندیان ولېږي، خو تر دې دمه د هغوی د بیرته ستنولو لپاره هیڅ اقدام نه دی شوی.