تاند (جمعه، د سنبلې ۱۶ که) متحده عربي امارات، چې په نړۍ کې د تیلو له بډایه هیوادونو څخه دی، اعلان وکړ چې د اتومي بټۍ جوړېدا یې بشپړه کړه.
امارات، چې په عربي هیوادونو کې لومړنی هیواد دی چې اتومي برېښنا کوټ جوړوي، دا کار یو”مهم ګام” وباله.
د متحده عربي اماراتو د اټومي انرژۍ ملي شرکت، ANAC، د پنجشنبې په ورځ، د سپتمبر په ۵ په یوه بیان کې اعلان وکړ چې په ابوظبي کې د براکه اټومي بټۍ به د څلورم او وروستي ریکټر د کار له پیلېدو وروسته په کال کې ۴۰ تیراواټ ساعته بریښنا تولید کړي.
د باراکه اتومي برېښناکوټ به د دې ګرم او صحرایي هیواد، چې د هوا د سړولو لپاره له ایرکنډېشن څخه ډېر کار اخیستل کېږي، ۲۵٪ برېښنا پوره کړي. دا تقریبا د نیوزیلینډ د یوه کال د بریښنا له مصرف سره برابر دی.
دا برېښناکوټ به، چې په ۲۰۲۲ کال کې یې د لومړي ریکټرکار پیل شو، د ابوظبي د تېلو ملي شرکت (ADNOC) په څیر شرکتونو ته، چې د نړۍ د تېلو یو له لویو تولیدونکو څخه دی، امارات فولاد او امارات ګلوبل المونیم ته برېښنا مهیا کړي.
د متحده عربي اماراتو دولتمشر، شیخ محمد بن زاید آل نهیان، د دې برېښناکوټ بشپړتیا “صفر کاربن ته د رسیدو په لور یو مهم ګام” وباله او ویې ویل: “موږ د خپل ملت او ګټو لپاره د انرژۍ امنیت او پایښت ته لومړیتوب ورکوو..”
د باراکه اتومي برېښناکوټ د نوي کیدونکي انرژۍ د سرچینو د پراختیا لپاره د متحده عربي اماراتو د هغو هڅو یوه برخه ده چې غواړي تر ۲۰۵۰ پورې د برېښنا نیمایي اړتیاوې له اتومي انرژۍ پوره کړي.