تاند (پنجشنبه، د سنبلې ۷ مه) طالبانو په هرات کې د باري موټرو د چلوونکو پر اعتراضیه غونډې پر حمله کې یو شمیر کسان ټپیان کړي دي.
پرون د بار وړونکو موټرو ګڼ شمېر چلوونکي د هرات ولایت د ترانسپورت کمیسیون مخې ته راټول وو.
د راپورونو له مخې، اعتراض هغه مهال پیل شو چې ځايي طالبانو بې نوبته ځینو موټرچلوونکو ته د پیسو په بدل کې پارچې ورکړې.
ویل شوي چې د اعتراض له پیلېدو سره سم وسله وال طالبان کمیسیون ته ننوتل او پر یو شمیر موټر چلووونکو يې ډزې وکړې، چې له کبله يې درې کسان ټپیان شوي دي.
د هرات ولایت طالب چارواکو ترواسه په دې اړه څه نه دي ويلي. خو له پرون راهیسي په ټولنیزو رسینو کې د اعتراض او او د طالبانو د ډزو ویدیوګانې خپرېږي.