تاند (چهارشنبه، د سنبلې ۷ مه) د امریکا دفاع وزارت وایي، سره له دې چې طالبان ادعا کوي چې په افغانستان کې د اسلامي دولت ډله په بشپړه توګه له منځه تللې، خو یو شمېر نورې ترهګرې ډلې هم په دغه هېواد کې فعالې دي.

د پینتاګږم یا د امریکا د وزارت ویاند جنرال پیټ رایډر پرون (سې شنبې) وویل چې اوس په افغانستان کې ډیرې ترهګرې ډلې شته او له همدې امله دوی د سیمې څارنې ته دوام ورکوي.

ښاغلي رایډر د تروریزم پر وړاندې پر مبارزې ټینګار وکړ او ویې ویل چې دوی د داعش په څېر د ډلو پر ګواښونو سترګې نه شي پټولی.

سره له دې چې په افغانستان کې د داعش د موجودیت او فعالیت په اړه اندېښنې مخ په زیاتېدو دي، د طالبانو د کورنیو چارو وزارت چارواکو پرون وویل چې داعش له منځه تللې او په افغانستان کې نه شته.

تر دې مخکې د طالبانو ویندوی ذبیح الله مجاهد هم په ځلونو ویلي چې د داعش ډله په افغانستان کې ځپل شوې او ځینې غړي یې په غرو رغو کې د تېشتې په حال کې دي.

له هغه وخته چې طالبان درې کاله وړاندې په افغانستان کې واک ته رسیدلي داعش په هېواد کې د یو شمېر بریدونو مسوولیت په غاړه اخیستی دی.