تاند (دوشنبه، د اسد ۱۵ مه) د طالبانو مشر هبة الله اخوندزاده د سرحدونو او قبایلو له وزارته غوښتي چې د ډیورند کرښې او له نورو هیوادونو سره د افغانستان د سرحدي سیمو د اوسیدونکو لومړنۍ اړتیاوې پوره کړي.
د هبة الله اخوندزاده په حکم کې د قومونو او قبایلو چارو وزارت څخه غوښتل شوي چې د دغه وزارت د سرپرست ملانورالله نوري په مشرۍ او د سرحدي ولایتونو د مرستیالانو، ولایتي ريیسانو، د سرحدي ولسوالیو د ولسوالانو او په سرحدي ولسوالیو کې د دفاع وزارت د استازو په ګډون دې ډیورند کرښې ته څېرمه او د نورو سرحدي سیمو د اوسیدونکو د ستونزو د حل لپاره یوه کمېټه جوړه کړي.
په دغه حکم کې د مالیې وزارت ته سپارښتنه شوې چې کمېټې ته لازمه بودجه ورکړي چې په یادو سیمو کې لومړني خدمات، دیني او عصري زده کړې، روغتیايی اسانتیاوې، مخابرات، سړکونه او د څښاک اوبه مهیا کړي.
د دې لپاره چې د افغانستان حکومتونو یا د اقتصادي ستونزو یا د امنیتي ننګونو په خاطر د سرحدي سیمو اوسیدونکو ته خورا ابتدايي خدمات برابر کړي نه دي، په ځانګړي ډول پاکستان له دې تشې ګټه پورته کړې، د دیورند کرښې په اوږدو کې یې د افغانستان په خاوره کې ځینو کلیو ته اوبه، سړک او ښووونځي برابر کړي او په تدریج یې له خپلې خاورې سره د دغو سیمو د یوځای کېدو هڅه کړې ده.
په تېرو کلونو کې په ځلونو د ننګرهار له ګوشتې داسي راپورونه ورکړل شول چې پاکستان د دې ولسوالۍ ځینو اوسیدونکو ته خپل شناختي کارډونه وېشلي دي.