تاند (یکشنبه، د اسد ۱۴ مه) د ناروې د پوهنتون یوه پروفیسره وايي چې په هیواد کې یې ډیری خلک نن سبا “د ګناه احساس کوي”.
د اوسلو په پوهنتون کې د سکنډینویا د ادبیاتو استاده الیزابت اکسفیلډ وايي، ډیری نارویژیان د نړۍ د نورو برخو د خلکو پرتله چې سخت او دردناک ژوند لري، د لوړ معیار ژوند کولو او د زیاتې شتمنۍ د لرلو له کبله احساس کوي چې ګناه کوي.
ناروې د نړۍ یو له بډایه هیوادونو څخه دی چې په اروپا کې له روسیې وروسته تر ټولو ډېر تېل لري.
په دې توپیر چې ناروې د روسیې پرتله خورا لږ نفوس لري او پر تېلو سربېره د عاید نورې ډېرې سرچینې هم لري.
د دغه هېواد د حکومت د پانګونې اصلي بسپنه، چې د تېلو د صندوق په نوم هم یادېږي، ۱.۷ تریلیون ډالره زېرمې لري.
که چیرې د ناروې زېرمې یا پیسې د دغه هیواد په وګړو ووېشل شي، نو د دې هیواد د خلکو سوکالي د بریتانیا په پرتله نژدې دوه چنده او حتی د متحدو ایالتونو په پرتله ډیرې دي، ځکه چې د دې هیواد نفوس یوازې پنځه نیم میلیونه دی.
پروفیسره اکسفیلډ په مسلکي توګه د ټولنې په کلتور باندې د سکنډینویايي فلمونو، کتابونو، ادبیاتو او تلویزیوني پروګرامونو اغیز مطالعه کوي، او باور لري چې د بډایه خلکو د ګناه دا ډول احساس په ډراماتیک ډول مخ په زیاتیدو دی.
د ناروې ځینې وروستي تلویزیوني لړۍ د بډایه طبقې په ژوند راڅرخي، چې د ټولنې په ټیټو طبقو یعني د مهاجرو کارګرو په خدماتو تکیه کوي.
اغلې اکسفیلډ وايي: “د دې کارونو په لیدو پوی شوم چې د خوښۍ، نیکمرغۍ او امتیاز د احساس کولو ترمنځ توپیر د شرم او ګناه سبب شوی. دا احساس په هرچا کې نه، خو په اکثرو کې لیدل شوی دی.»
د «نړۍ د خوښۍ د راپور» د شمېرو له مخې، ناروې له څو کلونو راهیسې په دې احصایه کې یو له لومړیو هېوادونو څخه دی او اوس په اووم ځای کې دی.
د ناروې د تیلو د صادراتو عاید په ۲۰۲۲ کې د روسیې او اوکراین له جګړې وروسته لوړ شو. منتقدانو ادعا وکړه چې ناروې له جګړې څخه ګټه پورته کوي، یا لږترلږه د جګړې له قربانیانو سره د تېلو له عایده ترلاسه کړې پیسې یې په کافي اندازه نه دي وېشلي.
ناروې تل د خپل هیواد د شتمنۍ د زیاتولو لپاره سمندرونو ته کتلي دي. له پیړیو راهیسې، سمندرونه د خوړو او انرژۍ سرچینه وه، خو له دې سره سره یوازې د ۱۹۶۹ تمې لسیزې په وروستیو کې د تیلو او ګازو کشف د دې پخواني نسبتا وروسته پاتې هیواد د شتمنیو له ډېرولو سره مرسته وکړه.
ناروې اوس یو له هغو هیوادونو څخه دی چې په ډېر خلاص لاس او بې غرضه له نورو هیوادونو سره مرسته کوي.