تاند (شنبه، د اسد۱۳مه) د طالبانو تر واک لاندې د اوبو او انرژۍ وزارت نن (شنبې) اعلان وکړ چې د کاسا ۱۰۰۰ پروژې کار به ژر په افغانستان کې پیل شي او په دې اړه له نړیوال بانک سره په لوړه کچه خبرې اترې روانې دي.
د سږ کال په پیل کې، نړیوال بانک تایید کړه چې کاسا زر پروژه به د دریو ګاونډیو هیوادونو په غوښتنه اجرا شي.
نړیوال بانک ټینګار کړی چې د پروژې ټول لګښت او راتلونکي عایدات به په بهر کې اداره کیږي او د طالبانو لاسوهنه به پکې حداقل وي.
خو د طالبانو په واک کې د اوبو او انرژۍ وزارت ادعا کړې چې د دې پروژې له فعالېدو سره به افغانستان د برېښنا له لېږد څخه په کال کې ۶۵ میلیونه ډالره عاید ترلاسه کړي.
تمه وه چې په افغانستان کې دا پروژه دوې میاشتې پخوا پیل شي.
د طالبانو له خوا د اوبو او انرژۍ وزارت چارواکو د شنبې په ورځ په کابل کې په یوه خبري کنفرانس کې وویل چې لا هم خبرې روانې دي. دوی څرګنده کړه چې د کاسا زر پروژې د پلي کولو هوکړې ته رسېدلي دي.
د اوبو او انرژۍ په وزارت کې د انرژۍ د پروګرامونو مشر فرهاد محمودي وویل:”د نړیوال بانک په پروژو کې، چې مخکې د اوبو او انرژۍ وزارت له خوا پلي شوي، د کاسا زر پروژه شامله ده.
تمه کیږي چې د ماسا زر پروژه تر ۲۰۲۶ پورې بشپړه شي.
د طالبانو تر واکمنۍ وروسته نړیوال بانک په افغانستان کې د ۴،۵ میلیارد ډالرو په ارزښت پروژې ودرولې. خو اوس د طالبانو تر واک لاندې د اوبو او انرژۍ وزارت خبر ورکړی چې په افغانستان کې د نړیوال بانک دفتر پرانستل شوی او نړیوال بانک د شرکتونو حسابونه تصفیه کوي او پورونه پرې کوي.