تاند (جمعه، د اسد ۵ مه) د طالبانو د دفاع وزارت سرپرست مولوي محمد یعقوب مجاهد وایي د دوی رژیم به ډېر ژر د هېواد د فضا کنټرول په لاس کې واخلي.
نوموړي پرون په کابل کې د خپلو ځواکونو د ستاینغونډې پر مهال وویل: “لکه څرنګه چې موږ پر ځمکنۍ بشپړتیا حاکمیت لرو، په لنډه موده کې به د هوايي حریم حاکمیت هم ولرو.”
ملا یعقوب ونه ویل، چې پر فضا به کنټرول څنګه او په کومو امکاناتو یا امریکایانو سره د کومې هوکړې له مخې تر لاسه کړي.
تر اوسه بیا- بیا طالب چارواکو نیوکه او شکایت کړی، چې امریکا له افغانستانه د خپلو ځواکونو له ایستو وروسته لا هم د افغانستان پر فضا واکمن دی او د دوی رژیم یې اندېښمن کړی.
د طالبانو له بیا واک ته رسېدو سره اوس هم وخت پر وخت د افغانستان پر یو شمېر ولایتونو د بې پیلوټه الوتکو د ګزمو خبرونه ورکول کیږي، چې طالبان یې مخنیوی نه شي کولای.