تاند (سه شنبه، د سرطان ۲۶ مه) د ملګرو ملتونو د کډوالو د عالي کمېشنرۍ یوه ویاند ویلي، چې له پاکستان څخه د افغان کډوالو د په زوره ایستلو بهیر له پيله تر اوسه شاوخوا ۶۳۰ زره افغان کډوال له دغه هېواده ایستل شوي.
په پاکستان کې د دغې کمېشنرۍ ویاند قیصر افریدي ویلي، دمګړۍ په پاکستان کې شاوخوا ۳ مېلیونه افغان کډوال ژوند کوي چې، قانوني او غیر قانوني کډوال پهکې شامل دي.
د کډوالو او راستنېدونکو چارو وزارت لپاره د طالبانو د رژیم ویاند عبدالمطلب حقاني بیا وایي، افغان کډوال باید د پاکستان په ګډون له هېوادونو په اجباري ډول ونه ایستل شي.
که څه هم د ملګرو ملتونو د کډوالو عالي کمېشنري افغان کډوالو ته د پاملرنې ادعا لري، خو کډوال نیوکه پرې کوي چې پاکستان او نورو ګاونډیو هېوادونو کې د کډوالو اړوند دغه او نورو سازمانونو د دوی ستونزو ته رسېدنه نه ده کړې.
پاکستان تورن دی، چې د افغان کډوالو له موجودیته تل پر افغانستان د فشار د وسیلې په توګه کار اخلي او اوس یې د دوی د په زوره شړلو له بهیر سره په افغانستان کې اقتصادي او بشري ناورین پسې زیات کړی.
په دې برخه کې د پاکستان، ایران او نورو هېوادونو د اقداماتو پر وړاندې د واکمن طالب رژیم چلند هم نیوکو سره مخ شوی.