تاند (سې شنبه، د سرطان ۱۹ مه) د پاکستان د بهرنیو چارو وزیر اسحاق ډار به په راتلونکو څو ورځو کې کابل ته سفر وکړي.

ده نن (سې شنبې) د خپل هیواد د سناجرګې غړیو ته د دې سفر خبره وکړه خو د خپل سفر د هدف په اړه یې څه ونه ویل.

د جيو نيوز د خبر له مخې ښاغلي ډار د پاکستان د سنا جرګې د بهرنيو چارو د کمېټې په غونډه کې وويل: «زه به په څو ورځو کې افغانستان ته ولاړ شم. افغانستان زموږ ورور هیواد دی.»

دا په داسي حال کې ده چې پاکستان په ځلونو د افغانستان له لوري د امنیتي ګواښ په اړه ادعاوې شوي او له طالبانو یې غوښتي چې ټي ټي پي وځپي.

د ټي ټي پي ځپل د طالبانو له حکومت څخه د اسلام اباد اصلي غوښتنه ده. د پاکستان د بهرنیو چارو وزیر یو ځل بیا ټینګار کړی چې تحریک طالبان پاکستان په افغانستان کې حضور لري.

له بلې خوا د پاکستان د بهرنیو چارو وزارت مرستیال محمد سیروس سجاد قاضي هم ویلي چې پاکستان به له افغانستان سره نژدې اړیکې وپالي.

ښاغلي قاضي وویل: «موږ له افغانستان سره نژدې اړیکې درلودې او دوام به یې ورکوو.

په تیرو دریو کلونو کې د پاکستان د بهرنیو چارو هیڅ وزیر افغانستان ته نه دی راغلی. وروستی ځل د عمران خان د حکومت د بهرنیو چارو وزیر شاه محمود قریشي ۱۴۰۰ لمربز کال په میزان میاشت کې کابل ته راغلی و.

په دې وروستیو کې د پاکستان پخواني لومړي وزیر عمران خان هم پر دې موضوع نیوکه کړې او ویلي یې دي چې پاکستان به د طالبانو د حکومت له ملاتړ پرته له ترهګرۍ سره په مبارزه کې بریالی نه شي.

په همدې منځ کې د پاکستان د پیپلز ګوند مشر د طالبانو تر کنټرول لاندې د پاکستان او افغانستان ترمنځ اړیکې پېچلې وبللې او ویې ویل چې ګومان نه کوي چې په داسانه دې حل شی.

بلاول بوټو زرداري د دوشنبې په ورځ په پېښور کې وویل چې د دوو خواوو ترمنځ ستونزې افغانستان ته په سفر کولو یا هلته د چای په څښلو نه حل کېږي.»

د شهباز شریف د حکومت په تېره دوره کې، چې بلاول بوټو د باندنیو چارو وزیر و، ځینې سیاستوالو پر بلاول بوټو انتقادونه کړي وو چې ولې افغانستان ته سفر نه کوي او له طالبانو سره د پاکستان پر ستونزو خبرې نه کوي.