تاند (شنبه، د جوزا ۱۹ مه) د افغانستان په اړه د سیمه ییز تماس ډلې ګډه غونډه نن د ایران په پلازمېنه تهران کې پيل شوه، خو پر کابل د طالبانو واکمن رژیم پکې له ګډون څخه ډډه کړې ده.
طالبانو د خپل نه ګډون دلیل نه دی ښودلی، خو ګومان کیږي چې د سیمه ییز تماس ډلې ناسته د دوحې د درېیمې ناستې د کمرنګه کولو په نیت جوړه شوې او طالبان په ډېر ګومان د همدې لپاره نه دي ورغلي.
په نننۍ غونډه کې د روسیې، چین او پاکستان استازي له ایران سره د افغانستان پر روان وضعیت غږیږي.
په غونډه کې د افغانستان لپاره د یادو هېوادونو ځانګړي استازي برخه لري.
د ایران د بهرنیو چارو وزارت سرپرست ډاکټر علي باقري غونډې ته په خپل استولي پيغام کې ویلي، چې له سیمې د باندې یو شمېر هېوادونه په سیمه کې د ستونزو جوړولو په هڅه کې دي.
هغه په مشخص ډول د کوم هېواد نوم نه دی اخیستی، خو معمولاً ایران او د سیمې نور لویدیز ضد هېوادونه د افغانستان په اړه د امریکا او لویدیزو متحدینو پالېسۍ او افغان لوریو سره اړیکې یې وخت په وخت نقدوي.
د ایران ناسته داسې مهال شوې، چې څو ورځې مخکې د طالبانو د کار او ټولنیزو چارو وزیر ملا عبدالمنان عمري روسیې ته تللی و او نن یې د پوهنې او لوړو زده کړو وزیران هم د دغه هېواد په سفر تللي.
د دوحې د درېیمې ناستې له نږدې کېدو سره، د طالبانو او سیمې اړیکې هم په تودیدو دي او سیمه ییز قدرتونه له لویدیز څخه د طالبانو د لیرې ساتلو په هڅه کې ښکاري.